នៅថ្ងៃពុធនេះ ទូរទស្សន៍រដ្ឋកូរ៉េខាងជើង KRT បានចាក់ផ្សាយវីដេអូរបស់លោកមេដឹកនាំ Kim Jong Un ចូលរួមពិធីប្រគល់នាវាពិឃាតមួយគ្រឿង ជាទីដែលលោកនិយាយថា រដ្ឋគួរតែផលិតនាវា ២គ្រឿង ឲ្យបានធំដូចជានាវា Choe Hyon ទម្ងន់ ៥ពាន់តោន នៅរយៈពេល ៥ឆ្នាំក្រោយ ។

ចំណែកឯទីភ្នាក់ងារព័ត៌មានផ្លូវការ KCNA របស់កូរ៉េខាងជើង រាយការណ៍ដែរថា លោក Kim បានចូលរួមពិធីមួយនេះ ដែលបានរៀបចំឡើងនៅកំពង់ផែ Nampho កាលពីថ្ងៃអង្គារ ដើម្បីប្រារព្ធពិធីដាក់ពង្រាយនាវាពិឃាតពហុបំណងថ្មី Choe Hyon ។

លោក Kim និយាយប្រាប់ពិធីនេះថា កម្មវិធីបំពាក់កងទ័ពជើងទឹកជាមួយនឹងអាវុធនុយក្លេអ៊ែរកំពុងអនុវត្តតាមផែនការរបស់ខ្លួនដោយពុំមានកំហុសឡើយ ។

លោកថា នេះគឺជាយុទ្ធសាស្ត្រដ៏សំខាន់មួយ ពីព្រោះវានឹងធ្វើឲ្យកូរ៉េខាងជើងអាចរក្សាកម្លាំងនុយក្លេអ៊ែររបស់រដ្ឋ ក្នុងការត្រៀមខ្លួនសម្រាប់ប្រតិបត្តិការចម្រុះ និងមានប្រសិទ្ធភាព ។

សូមបញ្ជាក់ថា កូរ៉េខាងជើងកំពុងស្ថិតនៅក្រោមកញ្ចប់ទណ្ឌកម្មជាច្រើន ពាក់ព័ន្ធនឹងកម្មវិធីនុយក្លេអ៊ែររបស់ខ្លួន ហើយលោក Kim បានទទូចម្តងហើយម្តងទៀតថា ពួកគេនឹងមិនបោះបង់ចោលឡើយ អាវុធនុយក្លេអ៊ែរ និងចាត់ទុកវាថាមានសារៈសំខាន់ សម្រាប់ការទប់ទល់អាមេរិក និងកូរ៉េខាងត្បូង ៕