អនុរដ្ឋមន្ត្រីការបរទេសរុស្ស៊ី លោក Sergey Ryabkov បានលើក​ឡើង​នៅ​ថ្ងៃពុធ (ទី២៤ ខែមិថុនា ឆ្នាំ២០២៦) នេះ​ថា ប្រទេស​រុស្ស៊ី និងសហរដ្ឋអាមេរិក មានគម្រោងធ្វើការពិគ្រោះយោបល់ជុំថ្មីមួយ ដែលមានគោលបំណងដោះស្រាយជម្លោះយូរអង្វែង នៅក្នុងទំនាក់ទំនងទ្វេភាគី។

នៅវេទិកាគោលនយោបាយការបរទេស Primakov Readings លោក Ryabkov បានប្រាប់សារប័ត៌មាន Izvestia ថា៖ «ខ្ញុំអាចបញ្ជាក់បានថា ផែនការបែបនេះមានមែន។ គ្មានអ្វីត្រូវប្រកាសទេ ព្រោះមិនមានកាលកំណត់ជាក់លាក់ណាមួយ ប៉ុន្តែវាត្រូវបានគេដឹង​ថា ផែនការនេះ​នឹងបន្តទៅមុខ​»។

លោក Ryabkov បានលើកឡើង​ទៀត​ថា លោករំពឹងថា ការពិគ្រោះយោបល់ នឹងធ្វើឡើងនៅចុងរដូវក្តៅ ទោះបីជាលោកទទួលស្គាល់ពីការលំបាក ក្នុងការសន្ទនាទ្វេភាគី ដើម្បីលុបបំបាត់ «កត្តារំខានទៅវិញទៅមក» ទាំងនេះក៏ដោយ។ លោកបានអះអាងថា រដ្ឋបាលរបស់ប្រធានាធិបតីអាមេរិក លោក Donald Trump កំពុងភ្ជាប់វឌ្ឍនភាពខ្លាំង​ឡើង​ ជុំវិញ​បញ្ហាទ្វេភាគី ទៅនឹងកិច្ចប្រឹងប្រែង ដើម្បីឈានដល់ការដោះស្រាយសង្គ្រាម នៅអ៊ុយក្រែន។

ជាមួយ​គ្នា​នេះ លោក Ryabkov ក៏បានចង្អុលបង្ហាញផង​ដែរ​ពីកង្វះកិច្ចសន្ទនា ស្ដី​ពី​បញ្ហាស្ថិរភាពជាយុទ្ធសាស្ត្រ ដោយនិយាយថា ទីក្រុងមូស្គូត្រូវការឃើញ «ការកែលម្អគួរឲ្យ​កត់សម្គាល់ និងជាក់ស្តែង» នៅក្នុងគោលនយោបាយរបស់ទីក្រុងវ៉ាស៊ីនតោន។

ហើយ​អនុរដ្ឋមន្ត្រីការបរទេសក៏បានលើកឡើងពីកង្វះវឌ្ឍនភាព ពាក់​ព័ន្ធ​នឹង​ការទាមទាររបស់រុស្ស៊ី សម្រាប់ការប្រគល់មក​វិញ​នូវ​ទ្រព្យសម្បត្តិការទូតដែលសហរដ្ឋអាមេរិករឹបអូស និងការស្ដារឡើងវិញនូវការតភ្ជាប់ផ្លូវអាកាសដោយផ្ទាល់ រវាងប្រទេសទាំង២៕