រដ្ឋមន្ត្រីវប្បធម៌ និងកីឡារបស់​អ៊ីស្រាអែល លោក Miki Zohar បាននិយាយនៅ​ថ្ងៃពុធ (ទី២៤ ខែមិថុនា ឆ្នាំ២០២៦) នេះ​ថា សហរដ្ឋអាមេរិកនឹងឃើញខ្លួនឯង «ស្ថិត​នៅលើផ្លូវប៉ះទង្គិច» ជាមួយប្រទេស​អ៊ីស្រាអែល ដោយសារ​កិច្ចព្រមព្រៀងជាមួយអ៊ីរ៉ង់ ដោយផ្ដល់​ហេតុផល​ថា កិច្ចព្រមព្រៀងនេះនឹងមិនដោះស្រាយក្ដី​បារម្ភ អំពី​កម្មវិធីនុយក្លេអ៊ែររបស់ទីក្រុងតេអេរ៉ង់​ឡើយ។

អំឡុង​ពេល​ថ្លែងនៅឯសន្និសីទរដ្ឋបាលមូលដ្ឋាន នៅទីក្រុង Tel Aviv លោក Zohar បានរិះគន់ការដោះស្រាយការចរចារបស់សហរដ្ឋអាមេរិកជាមួយទីក្រុងតេអេរ៉ង់ ហើយបានព្រមានថា «ការ​ធ្វើ​បែបនេះ​របស់សហរដ្ឋអាមេរិក នាពេលនេះ ទាក់ទងនឹងបញ្ហាអ៊ីរ៉ង់ គឺមិនល្អប្រសើរ​ឡើយ​»។

លោក Zohar ត្រូវបានដកស្រង់សម្តីដោយគេហទំព័រព័ត៌មានអ៊ីស្រាអែល Ynet ដែល​បាន​និយាយ​ថា «ពួកគេមិនបានយល់ច្បាស់នោះឡើយ​ថា តើ​អ្នកណាដែលពួកគេកំពុងដោះស្រាយជាមួយ»។

លោកបានសង្កត់ធ្ងន់ថា «សហរដ្ឋអាមេរិកនឹងឃើញខ្លួនឯងស្ថិត​នៅលើផ្លូវប៉ះទង្គិច ឬប្រឈមមុខ​ជាមួយអ៊ីស្រាអែល នាពេលអនាគតដ៏ខ្លីខាងមុខនេះ ហើយការឆ្លើយតបរបស់យើង ចំពោះសហរដ្ឋអាមេរិក នឹងមិនមានដោយ​ស្វ័យប្រវត្តិទេ» ដោយព្រមានថា ការ​ខ្វែង​គំនិត​គ្នា រវាងទីក្រុងវ៉ាស៊ីនតោន និង Tel Aviv អាចកាន់តែជ្រៅ​ទៅៗ ក្នុងរយៈពេលខាងមុខដ៏ខ្លី។ លោកបានបន្ថែម​ថា «ផលប្រយោជន៍សន្តិសុខរបស់យើងនឹងកំណត់វិធានការយោធា»។

ជាមួយ​គ្នានេះ រដ្ឋមន្ត្រីរូប​នេះ ក៏បានសម្តែងមន្ទិល​សង្ស័យ អំពីប្រសិទ្ធភាពនៃអនុស្សរណៈយោគយល់គ្នារវាងសហរដ្ឋអាមេរិក និងអ៊ីរ៉ង់ ដែលមានគោលបំណងបញ្ចប់សង្គ្រាម។

ការកត់សម្គាល់របស់លោក Zohar បែបនេះ បានកើតឡើងចំពេលមានការរិះគន់កាន់តែខ្លាំងឡើង នៅក្នុងរង្វង់​មជ្ឈដ្ឋាន​អ៊ីស្រាអែល ចំពោះរដ្ឋបាលរបស់លោកប្រធានាធិបតីអាមេរិក Donald Trump បន្ទាប់ពីមាន​ការចុះហត្ថលេខាលើអនុស្សរណៈនៃការយោគយល់ជាមួយអ៊ីរ៉ង់៕