កាលពីថ្ងៃអង្គារម្សិលមិញ ក្រុមអាជ្ញាធរកូស្តារីកា បានចុះប្រតិបត្តិការទ្រង់ទ្រាយធំបំផុតនៅក្នុងប្រវត្តិសាស្រ្តរបស់ខ្លួន ដោយមានគោលដៅលើក្រុមមេក្លោងគ្រឿងញៀនក្នុងស្រុកដែលមានទំនាក់ទំនងនឹងការជួញដូរគ្រឿងញៀនអន្តរជាតិ ។

រូបភាពវីដេអូឃ្លីបពីក្រសួងសន្តិសុខសាធារណៈកូស្តារីកា ឃើញក្រុមមន្រ្តីនគរបាល ចូល និងឡោមព័ទ្ធអចលនទ្រព្យជាច្រើនកន្លែងនៅក្នុងទីក្រុង Limon ស្ថិតនៅតាមតំបន់ឆ្នេរសមុទ្រការ៉ាអ៊ីបរបស់ប្រទេសមួយនេះ អំឡុងការវាយឆ្មក់ជាបន្តបន្ទាប់របស់ពួកគេ ។

លោក Michael Soto គឺជាប្រធានទីភ្នាក់ងារស៊ើបអង្កេតតុលាការនិយាយថា ក្រុមអាជ្ញាធរបានធ្វើការវាយឆ្មក់ ៩៧លើកលើអចលនទ្រព្យ ៩៧កន្លែង និងរចនាសម្ព័ន្ធ ១៤១កន្លែង ដែលជាផ្នែកមួយនៃប្រតិបត្តិការ “មាត់ទន្លេ” ។

ប្រតិបត្តិការនេះ ធ្វើឡើង ដើម្បីរុះរើក្រុមឧក្រិដ្ឋជនដែលអាជ្ញាធរនិយាយថា បានបន្តប្រតិបត្តិការជួញដូរគ្រឿងញៀនរបស់ពួកគេ ក្រោយការធ្វើបត្យាប័នទៅកាន់សហរដ្ឋអាមេរិករបស់មេក្លោងគ្រឿងញៀនរងការចោទប្រកាន់លោក Edwin Lopez ។

យោងតាមការអះអាងរបស់ក្រុមអាជ្ញាធរ បានឲ្យដឹងថា មន្រ្តីជាង ១.៥០០នាក់ បានចូលរួមប្រតិបត្តិការនេះ ដែលមានគោលបំណង ដើម្បីចាប់ខ្លួនមនុស្ស ៤១នាក់ និងរឹបអូសបានទ្រព្យសម្បត្តិតម្លៃជិត ២២លានដុល្លារ ។

ទ្រព្យសម្បត្តិដែលរឹបអូសបានទាំងនេះ រួមមានគ្រឿងចក្រសំណង់ រថយន្តប្រណីត សណ្ឋាគារ ៦កន្លែង ទីលានជល់គោមួយកន្លែង ភោជនីយដ្ឋានមួយកន្លែង ផ្ទះជួលសម្រាប់ភ្ញៀវទេសចរ កីឡដ្ឋានមួយកន្លែង ទីលានបាល់ទាត់ និងកសិដ្ឋានដែលមានគោក្របីរាប់រយក្បាល ៕