ភ្ញៀវទេសចរនៅលើកោះ Santorini បានជួបជុំគ្នាក្រោយពីត្រូវកម្លោចដោយកម្តៅថ្ងៃ ដើម្បីមើលថ្ងៃលិចនៅលើកោះដ៏មានប្រជាប្រិយភាពរបស់ប្រទេសក្រិកមួយនេះ ស្របពេលរលកកម្តៅកំពុងវាយប្រហារអឺរ៉ុប ។

អ្នកស្រី Alysha Dennis គឺជាភ្ញៀវទេសចរមួយរូបមកពីទីក្រុងស៊ីដនី ប្រទេសអូស្រ្តាលី ដែលបានធ្វើដំណើរមកជាមួយកូនស្រីរបស់គាត់និយាយថា ការមើលថ្ងៃលិចនៅទីនេះ ស្ថិតក្នុងតារាងគោលដៅទេសចរណ៍របស់ពួកគេ ។

ភ្ញៀវទេសចរប្រឹងប្រែងដើរទាំងបែកញើសជោកពេញប្រាណនៅតាមផ្លូវថ្មទឹកធ្លាក់ និងជណ្តើរតាមជើងភ្នំ ពេលដែលអាកាសធាតុក្តៅខ្លាំងនារដូវក្តៅនៅក្នុងប្រទេសក្រិកចាប់ផ្តើមកើនឡើង ។

បើទោះបីជាសីតុណ្ហភាពហក់ឡើងខ្ពស់ដែលកំពុងវាយប្រហារតំបន់ភាគខាងលិចអឺរ៉ុប មិនបានជះឥទ្ធិពលដល់ប្រទេសក្រិកយ៉ាងណាក្តី ប្រទេសមួយនេះ ត្រូវបានញាំញីដោយរលកកម្តៅរៀងរាល់រដូវក្តៅ ហើយសម្រាប់ភ្ញៀវទេសចរមួយចំនួនដូចជាលោក Peter Homkanen មកពីប្រទេសហ្វាំងឡង់ វាពិតជាក្តៅខ្លាំងណាស់ ពេលដើរតាមផ្លូវនៅលើកោះ Santorini ។ លោកថា លោកបានតាមដានយ៉ាងដិតដល់ស្ថានភាពអាកាសធាតុនៅតំបន់ផ្សេងទៀតរបស់អឺរ៉ុប ។

ចំណែកឯលោក Kevin Fox គឺជាភ្ញៀវទេសចរមកពីអៀរឡង់ និយាយថា លោកត្រូវផឹកស្រាបៀត្រជាក់ៗ ដើម្បីអាចឡើងភ្នំបាន ពេលអាកាសធាតុក្តៅខ្លាំងបែបនេះ ។

សូមបញ្ជាក់ថា មនុស្ស ៤០នាក់ បានលង់ទឹកស្លាប់នៅបារាំង ក្នុងរយៈពេលប៉ុន្មានថ្ងៃកន្លងមកនេះ ស្របពេលដែលរលកកម្តៅវាយប្រហារតំបន់ជាច្រើនរបស់អឺរ៉ុប ។ អង់គ្លេស អ៊ីតាលី ស្វីស និងអេស្ប៉ាញ បានមើលឃើញអាកាសធាតុក្តៅខ្លាំងផងដែរ ៕