ប្រព័ន្ធផ្សព្វផ្សាយរដ្ឋ បាន​រាយការណ៍​ថា កាលពីថ្ងៃពុធ (ទី២៤ ខែមិថុនា ឆ្នាំ២០២៦) ប្រទេសចិនបានលើក​ឡើងថា កតិកាសញ្ញា រវាងសហរដ្ឋអាមេរិក និងអ៊ីរ៉ង់ គឺ​ស្របតាមផលប្រយោជន៍ជាមូលដ្ឋាន និងរយៈពេលវែងរបស់ទីក្រុងតេអេរ៉ង់ ក៏ដូចជាការរំពឹងទុករួមគ្នារបស់សហគមន៍អន្តរជាតិ។។

នោះគឺ​ជាការកត់សម្គាល់របស់​​រដ្ឋមន្ត្រីការបរទេស លោក​ Wang Yi ក្នុងអំឡុងពេលមាន​ការ​សន្ទនា​តាម​ទូរស័ព្ទជាមួយសមភាគីប៉ាគីស្ថានរបស់លោក គឺលោក Ishaq Dar។

អំឡុង​ពេលជជែក​គ្នា​នោះ លោក Dar បានជម្រាបជូនលោក Wang អំពីកិច្ចពិភាក្សាបច្ចេកទេសជុំទី១ នៅប្រទេសស្វីស រវាងសហរដ្ឋអាមេរិក និងអ៊ីរ៉ង់ កាលពីដើមសប្តាហ៍នេះ ដោយ​នាំឲ្យ​មានការបង្កើតគណៈកម្មាធិការកម្រិតខ្ពស់មួយ ដែលមានគោលបំណងផ្តល់ការត្រួតពិនិត្យដល់ដំណើរការសម្របសម្រួល ក្រោមអនុស្សរណៈនៃការយោគយល់គ្នាទីក្រុងអ៊ីស្លាម៉ាបាដ (Islamabad MOU)។ នេះបើយោងតាមសេចក្តីថ្លែងការណ៍ពីក្រសួងការបរទេសប៉ាគីស្ថាន។

តាម​រយៈ​សេចក្ដី​ថ្លេងការណ៍​នោះ លោកបានបន្ថែមថា ក្រុមការងារចំនួន៣ ដែលត្រូវបាន​បង្កើតឡើង ដើម្បីផ្តោតលើបញ្ហានុយក្លេអ៊ែរ ទណ្ឌកម្ម និងការត្រួតពិនិត្យ និងការដោះស្រាយជម្លោះ នឹងមានគោលបំណងសម្រួលដល់កិច្ចព្រមព្រៀងចុងក្រោយ រវាងភាគីទាំង២ ក្នុងរយៈពេល ៦០​ថ្ងៃ។

សម្រាប់​លោក Wang រដ្ឋ​មន្ត្រី​ការបរទេស​រូប​នេះ​បានបញ្ជាក់​ថា ប្រទេសចិនមានឆន្ទៈក្នុងការធ្វើការជាមួយភាគីទាំងអស់ ដោយ​គាំទ្រយ៉ាងមុតមាំដល់ដំណើរ​ការចរចា ដើម្បីឆ្ពោះ​ទៅមុខដោយគ្មានការជ្រៀតជ្រែក។ ហើយ​លោកបានជំរុញឲ្យ​បណ្តាប្រទេស នៅតំបន់​មជ្ឈិមបូព៌ា «កែលម្អ» ទំនាក់ទំនងរបស់ពួកគេជាបន្ទាន់ និងស្វែងរក «ប្រព័ន្ធ​សហប្រតិបត្តិការ​សន្តិសុខក្នុង​តំបន់» ថ្មីមួយ ខណៈដែលសហរដ្ឋអាមេរិក និងអ៊ីរ៉ង់ គ្រោងនឹងបន្តកិច្ចពិភាក្សាបច្ចេកទេស នៅសប្តាហ៍ក្រោយ៕