នៅក្នុងសុន្ទរកថាពេលល្ងាចរបស់លោក កាល​ពី​ថ្ងៃពុធ (ទី២៤ ខែមិថុនា ឆ្នាំ២០២៦) លោកប្រធានាធិបតី លោក Volodymyr Zelenskyy បានលើក​ឡើង​ថា ប្រទេស​អ៊ុយក្រែននឹងធ្វើការវាយប្រហារបង្ការ​ជា​មុនលើទីតាំងដែលរុស្ស៊ីកំពុងប្រើប្រាស់ សម្រាប់សង្គ្រាមរបស់ខ្លួន ខណៈដែលទីក្រុងគីវពង្រីកការវាយប្រហារលើហេដ្ឋារចនាសម្ព័ន្ធថាមពល ជាការប៉ុនប៉ងបង្ខំឲ្យ​ទីក្រុងមូស្គូព្រម​ចូលចរចា។

លោក Zelenskyy បាននិយាយថា៖ «ខ្ញុំបានណែនាំទីភ្នាក់​ងារ​ស៊ើបការណ៍សម្ងាត់ និងយោធារបស់យើងឲ្យអនុវត្ត​សកម្មភាពជាមុន ប្រឆាំងនឹងទីតាំងដែលរុស្ស៊ីប្រើប្រាស់ ដើម្បីពង្រីកកិច្ចប្រឹងប្រែងធ្វើសង្គ្រាមរបស់ខ្លួន​»។

កាលពីថ្ងៃពុធ យានដ្រូន​របស់អ៊ុយក្រែន បានបំផ្លាញថាមពលនៅក្នុងទីក្រុងធំបំផុត នៅក្នុងតំបន់គ្រីមៀដែលកាន់កាប់ដោយរុស្ស៊ី និងបានកំណត់គោលដៅទីតាំងនៅភាគ​កណ្តាល និងភាគខាងត្បូង​រុស្ស៊ី ខណៈដែលវិបត្តិប្រេងឥន្ធនៈ មាន​សភាព​កាន់តែធ្ងន់ធ្ងរឡើង ដោយទីក្រុងគីវបន្តវាយប្រហាររោងចក្រចម្រាញ់ប្រេង និងធនធាន​ថាមពល​។

ប្រភពឧស្សាហកម្មបានឲ្យដឹង​ថា រោងចក្រចម្រាញ់ប្រេងរបស់រដ្ឋធានីមូស្គូ នឹងបិទយ៉ាងហោចណាស់ ៦ខែ បន្ទាប់ពីរងការខូចខាតយ៉ាងខ្លាំង អំឡុង​ការវាយប្រហារដោយយានដ្រូន​របស់អ៊ុយក្រែន ដែលធ្វើឲ្យស្មុគស្មាញ​ដល់​​កិច្ចប្រឹងប្រែងរបស់រុស្ស៊ី ក្នុងការដោះស្រាយបញ្ហាកង្វះខាតប្រេងឥន្ធនៈ នៅទូទាំងប្រទេសដ៏​ធំបំផុតរបស់ពិភពលោកមួយ​នេះ៕