នៅថ្ងៃព្រហស្បតិ៍ (ទី២៥ ខែមិថុនា ឆ្នាំ២០២៦) នេះ ក្រុមអ្នកស្រាវជ្រាវ បានឲ្យ​ដឹង​ថា ការហាមប្រើ​ប្រាស់​បណ្ដាញ​សង្គមរបស់ប្រទេសអូស្ត្រាលី សម្រាប់ក្មេងអាយុក្រោម ១៦ឆ្នាំ ផ្ដល់​ផលប៉ះពាល់​តិចតួចប៉ុណ្ណោះ ចំពោះ​ទម្លាប់នៃការទាញ​អេក្រង់ទូរស័ព្ទចុះ​ឡើង​របស់ក្មេងជំទង់ ដោយ​នេះ​ជា​ការវាយតម្លៃលើកដំបូង លើ​វិធានការ​នាំ​មុខគេរបស់​ពិភពលោកនេះ​។

កាលពីខែធ្នូឆ្នាំមុន​ អូស្ត្រាលីបានដាក់​បម្រាម​ ចំពោះ​ក្មេងអាយុក្រោម ១៦ឆ្នាំ មិន​ឲ្យ​ប្រើ​ប្រាស់​បណ្ដាញ​សង្គម​នានា ដូចជា Facebook, Instagram និង TikTok ជាដើម ជា​វិធានការបង្ក្រាបដែលត្រូវបានបង្កើត​ឡើង ដើម្បីការពារកុមារកុំ​ឲ្យមាន​ការរំលោភបំពាន​តាមប្រព័ន្ធ​អ៊ីនធឺណិត និង «ក្បួនដោះស្រាយបង្កគ្រោះថ្នាក់»។

ប៉ុន្តែមានភស្តុតាងតិចតួចណាស់ដែលបង្ហាញថា ក្មេងជំទង់បានងាកចេញពីបណ្ដាញ​សង្គម ដោយសារ​បម្រាម​នេះ។ នេះ​បើយោង​តាមការរកឃើញរបស់​​ក្រុមអ្នកស្រាវជ្រាវមានមូលដ្ឋាននៅប្រទេសអូស្ត្រាលី នៅក្នុងការសិក្សាដែលត្រូវបានពិនិត្យដោយអ្នកជំនាញផ្សេង​ទៀត​ និង​ដែលត្រូវ​បានបោះពុម្ពផ្សាយដោយស្ថាប័ន​​ British Medical Journal។

ការ​សិក្សានោះបាន​បង្ហាញ​ថា អ្នកប្រើប្រាស់មិនទាន់គ្រប់អាយុ បានគេចពីការរឹតបន្តឹងនេះ​ ដោយប្រើប្រាស់គណនីដែលត្រូវ​បានចុះឈ្មោះ សម្រាប់មនុស្សចាស់ ការបង្កើតគណនីក្លែងក្លាយ ឬដោយការចូលទៅក្នុងកម្មវិធីស្វែង​រកឯកជន។ ក្រុម​អ្នកស្រាវជ្រាវបានសរសេរថា៖ «យើងបានរកឃើញភស្តុតាងមិនគ្រប់គ្រាន់ ក្នុង​ការ​សន្និដ្ឋានបាន​ថា ​ច្បាប់ (ច្បាប់អាយុអប្បបរមាបណ្ដាញ​សង្គម) នេះ មានផលប៉ះពាល់គួរឲ្យ​កត់សម្គាល់ លើការប្រើប្រាស់បណ្ដាញ​សង្គម ក្នុងចំណោមក្មេងជំទង់ដែលមានអាយុក្រោម ១៦ឆ្នាំ»។

ក្រុមអ្នកស្រាវជ្រាវ បានស្ទង់មតិអ្នកប្រើប្រាស់បណ្ដាញ​សង្គមវ័យក្មេងជាង ៤០០នាក់ ពោល​គឺ​ភ្លាមៗមុនពេលការរឹតបន្តឹងចូលជាធរមាន និងម្តងទៀត នៅ ៣ខែបន្ទាប់។ ក្រុម​នេះ​បាន​បញ្ជាក់​ថា មានការផ្លាស់ប្តូរតិចតួច សម្រាប់អ្នកប្រើប្រាស់ដែល​មាន​អាយុពី ១២ ទៅ ១៣ឆ្នាំ ការថយចុះបន្តិចបន្តួច សម្រាប់ក្រុមអាយុពី ១៤ ទៅ ១៥ឆ្នាំ និងការកើនឡើងនូវ​ការប្រើប្រាស់ សម្រាប់អ្នកមានអាយុចាប់​ពី ១៦ឆ្នាំ និង​លើសពី​នោះ​៕