ប្រធានាធិបតីអាមេរិក លោក Donald Trump បាននិយាយកាលពីថ្ងៃពុធ (ទី២៤ ខែមិថុនា ឆ្នាំ២០២៦) ថា សមភាគីអ៊ុយក្រែនរបស់លោក គឺលោក Volodymyr Zelenskyy ដែលលោកធ្លាប់បាននិយាយថា មិន​មាន​ «សន្លឹកបៀ» ដើម្បីទទួល​បាន​ជ័យ​ជម្នះ​នោះ កំពុងធ្វើបានល្អ ក្នុងសង្គ្រាមប្រឆាំងនឹងកងកម្លាំងឈ្លានពានរបស់​រុស្ស៊ី​។

ក្នុងសុន្ទរកថាទៅកាន់អ្នកសារព័ត៌មាននៅក្នុងការិយាល័យប្រធានាធិបតី​ Oval Office លោក Trump បាននិយាយអំពីលោក Zelenskyy ថា៖ «គាត់កំពុងធ្វើបានល្អគួរសម​។ យ៉ាងហោចណាស់គាត់កំពុងទប់ទល់​បាន​។ មនុស្សជាច្រើនបានស្លាប់ សម្រាប់ភាគីទាំង​២ ប៉ុន្តែខ្ញុំគិតថា គាត់កំពុងធ្វើបានល្អគួរសម​»។

មេដឹកនាំ​អាមេរិក​បាន​បន្ថែម​ថា៖ «អ្នកត្រូវតែនិយាយថា គាត់មានភាពក្លាហាន គាត់មានគ្រឿងយុទ្ធោបករណ៍​ដ៏អស្ចារ្យ ហើយ​គាត់មានមនុស្ស​ដ៏អស្ចារ្យ ពោល​គឺ​គាត់មានយុទ្ធជនដ៏អស្ចារ្យ​»។

អ្នកវិភាគលើក​ឡើង​ថា អ៊ុយក្រែនកំពុងទប់​ទល់​បានកាន់តែល្អ នៅសមរភូមិ ប៉ុន្តែទីក្រុងរបស់ខ្លួន នៅតែជាគោលដៅនៃការវាយប្រហារដ៏ខ្លាំង​ក្លា​របស់រុស្ស៊ី នៅក្នុងជម្លោះដែលឥឡូវនេះមានរយៈពេលយូរជាងសង្គ្រាមលោកលើកទី១។

លោក Trump និងលោក Zelenskyy ថ្មីៗនេះ បានជួបគ្នា ក្នុងអំឡុងពេលមាន​កិច្ចប្រជុំកំពូលក្រុម​ប្រទេសមានឧស្សាហកម្ម​លូតលាស់ទាំង៧ (G7) នៅប្រទេសបារាំង ជាកន្លែងដែលមេដឹកនាំបានយល់ព្រមបង្កើនសម្ពាធលើរុស្ស៊ី ដើម្បី​ឲ្យ​បញ្ចប់សង្គ្រាមជាង ៤ឆ្នាំជាមួយអ៊ុយក្រែន៕