ភ្នំពេញ៖ ក្រសួងទេសចរណ៍ បានអំពាវនាវអោយបណ្តាអាជីវកម្មទាំងអស់ក្នុងវិស័យទេសចរណ៍ បន្តទៅធ្វើអាជ្ញាប័ណ្ណទេស​ចរណ៍ ដើម្បីបន្តសុពលភាពអាជីវកម្មខ្លួនក្នុងឆ្នាំ២០២២នេះ ទាំងអស់គ្នា ខណៈការធ្វើអាជ្ញាប័ណ្ណនោះ រាជរដ្ឋាភិបាលបន្តការលើកលែងដោយមិនមានការយកថ្លៃនោះទេ។

បើតាមឯកឧត្តម សុង តុងហាប់ រដ្ឋលេខាធិការក្រសួងទេសចរណ៍ បានថ្លែងប្រាប់BTV នៅថ្ងៃទី២៨ខែមេសានេះថា នៅក្នុងអំឡុងពេលនេះ កម្ពុជាជួបជំងឺរាតត្បាតកូវីដ១៩ គឺមានអាជីវកម្មទេសចរណ៍ប្រមាណជាង ៣០០០ទីតាំង ដែលបានបិទបណ្តោះអាសន្ន ហើយគិតចាប់ពីរាជរដ្ឋាភិបាលប្រកាសបើកប្រទេសវិញនៅខែវិច្ឆិកាឆ្នាំ២០២១ រហូតមកដល់​ដំណាច់ខែមីនាឆ្នាំ២០២២នេះ ​គឺមានអាជីវកម្មទេសចរណ៍ប្រមាណជាង ១៧០០អាជីវកម្ម បាន​កំពុង​បើកដំណើរការ ​ហើយនៅសល់អាជីវកម្មទេសចរណ៍ ១ ៤២៩ទីតាំងបន្តរងប៉ះពាល់មិនទាន់​បានបើកដំណើរការវិញ។

ឯកឧត្តម សុង តុងហាប់ បញ្ជាក់ថា នៅក្នុងចំណោមអាជីវកម្មដែល​បានបើកដំណើរវិញនោះ គឺមាន​អាជីវកម្មប្រមាណ ៤០%បានស្នើបន្តសុពលភាពអាជ្ញាប័ណ្ណអាជីវកម្មទេសចរណ៍ឥតគិតថ្លៃសេវា ដែលបញ្ហានេះ ឯកឧត្តម ក៏បានស្នើអាជីវកម្មទេសចរណ៍ផ្សេងៗទៀតត្រូវ​ទៅបន្តសុពលភាព​អាជ្ញាប័ណ្ណ​បន្តអាជីវកម្មទាំងអស់គ្នានេះ។

បើតាមអ្នកគ្រប់គ្រងភោជនីយដ្ឋានខេម៉ា លោកស្រី សុខ ខន្តី ថ្លែងថា សម្រាប់ការធ្វើអាជ្ញាប័ណ្ណបន្ត​សុពលភាពដំណើការអាជីវកម្មទេសចរណ៍ឆ្នាំ២០២២​ គឺ​ភោជនីយដ្ឋាន​លោកស្រី ​បានធ្វើរួចហើយ ហើយ​រាជរដ្ឋាភិបាលមិនយកប្រាក់កម្រៃសេវា និងប្រាក់ពន្ធណានោះទេ។

បើតាមការបញ្ជាក់ពីឯកឧត្តម សុង តុបហាប់ ​បានឱ្យដឹងថា ការមិនយកប្រាក់កម្រៃ​សេវាការធ្វើ​អាជ្ញាប័ណ្ណបន្តសុពលភាពអាជីវកម្មទេសចរណ៍នេះ​ គឺបានធ្វើអោយជាតិ ​បាត់បង់ចំណូល ប្រមាណជាង ៣០០០រៀល ក្នុងមួយឆ្នាំៗ​ដោយសារការរាតត្បាតកូវីដ១៩។

ឯកឧត្តម បន្តថា ​ទោះយ៉ាងណានៅក្នុងឆ្នាំ២០២១កន្លងមក ​រាជរដ្ឋាភិបាលក៏ទទួលបានចំណូល​ជាតិ​ខ្លះៗដែរ ​លើការផ្តល់​អាជ្ញាប័ណ្ណ​អាជីវកម្មទេសចរណ៍ដែល​បានបើកថ្មីបន្ថែមដែល​មាន​ប្រមាណ​ជាង១៥%៕អត្ថបទ ស៊ុម សុខជា