លោក Mark Rutte ប្រមុខសម្ព័ន្ធយោធាណាតូ បាននិយាយកាលពីថ្ងៃព្រហស្បតិ៍ ទី២៥ ខែមិថុនា ថា កិច្ចសន្យាថ្មីក្នុងទឹកប្រាក់រាប់ពាន់លានដុល្លារទាក់ទងនឹងវិស័យការពារជាតិនឹងត្រូវប្រកាសនៅក្នុងកិច្ចប្រជុំកំពូលរបស់សម្ព័ន្ធមិត្តនៅខែកក្កដាខាងមុខ ក្នុងទីក្រុងអង់ការ៉ា ប្រទេសទួរគី។

ក្នុងសុន្ទរកថា នៅឯក្រុមប្រឹក្សាអាត្លង់ទិក លោក Rutte បាននិយាយថា សម្ព័ន្ធយោធាណាតូ សន្យាគាំទ្រអ៊ុយក្រែននៅក្នុងកិច្ចប្រជុំកំពូលដែលប្រធានាធិបតីអ៊ុយក្រែន លោក Volodymyr Zelenskiy នឹងចូលរួម។ ប្រមុខសម្ព័ន្ធយោធាណាតូ ធ្វើទស្សនកិច្ចនៅទីក្រុងវ៉ាស៊ីនតោន ដើម្បីព្យាយាមបន្ធូរបន្ថយភាពតានតឹងជុំវិញសង្គ្រាមនៅអ៊ីរ៉ង់ និងការគំរាមកំហែងរបស់សហរដ្ឋអាមេរិកក្នុងការដកកងទ័ពនៅអឺរ៉ុបនៅមុនកិច្ចប្រជុំកំពូលមេដឹកនាំអង្គការណាតូដ៏សំខាន់នៅក្នុងខែកក្កដា ក្នុងទីក្រុងអង់ការ៉ា។

ប្រទេសអ៊ីតាលី កាលពីថ្ងៃពុធសប្តាហ៍នេះ បានជំទាស់ទៅនឹងការថ្លែងលើកឡើងរបស់លោក Rutte អគ្គលេខាធិការអង្គការណាតូ ដែលថាយន្តហោះអាមេរិករាប់រយគ្រឿងបានហោះចេញពីមូលដ្ឋានទ័ពអាមេរិកក្នុងប្រទេសអ៊ីតាលីក្នុងការគាំទ្រប្រតិបត្តិការយោធាប្រឆាំងប្រទេសអ៊ីរ៉ង់ ដោយនិយាយថា ទីក្រុងរ៉ូមបានអនុញ្ញាតឱ្យមានតែជើងហោះហើរបច្ចេកទេស និងភស្តុភារ ប៉ុណ្ណោះ។ លោក Rutte បាននិយាយទៅកាន់ទូរទស្សន៍ Fox News ថា លោកបានលើកឡើងពីប្រទេសអ៊ីតាលី ថាជាឧទាហរណ៍នៃការគាំទ្ររបស់អឺរ៉ុបចំពោះសហរដ្ឋអាមេរិក និងបាននិយាយថា យន្តហោះអាមេរិកចំនួន ៥០០គ្រឿងបានហោះចេញពីមូលដ្ឋានអាមេរិកនៅក្នុងប្រទេសអ៊ីតាលី ក្នុងការគាំទ្រ «Epic Fury» ជាឈ្មោះរបស់ទីក្រុងវ៉ាស៊ីនតោនសម្រាប់សង្គ្រាមដែលខ្លួនបានចាប់ផ្តើមរួមគ្នាជាមួយអ៊ីស្រាអែល។ លោក Trump ដែលជាអ្នករិះគន់អង្គការ NATO ជាយូរមកហើយ បានហៅសម្ព័ន្ធនេះថាជា «ខ្លាក្រដាស» ធ្វើឲ្យសម្ព័ន្ធមិត្តមួយចំនួនមានកំហឹង ខណៈពួកគេបដិសេធការគាំទ្រសហរដ្ឋអាមេរិកក្នុងជម្លោះនៅតំបន់មជ្ឈិមបូព៌ា ឬជួយបើកច្រកសមុទ្រ Hormuz ឡើងវិញ។