ប្រទេសចិនបានចេញសេចក្តីថ្លែងការណ៍រួមមួយ តំណាង​ឲ្យ​ជិត ២០ប្រទេស​ នៅក្នុងសម័យប្រជុំលើកទី៦២ នៃក្រុមប្រឹក្សាសិទ្ធិមនុស្សអង្គការសហប្រជាជាតិ (UNHR) កាលពីថ្ងៃព្រហស្បតិ៍ (ទី២៥ ខែមិថុនា ឆ្នាំ២០២៦) ដើម្បីបង្ហាញ និងថ្កោលទោសការអនុវត្តពន្ធគយជា​ឯកតោភាគី ក្រោមលេសនៃការ​ប្រើប្រាស់​ «កម្លាំងពលកម្មដោយបង្ខំ»។

សេចក្តីថ្លែងការណ៍រួមនេះ ត្រូវបានថ្លែងដោយលោក Jia Guide តំណាងអចិន្ត្រៃយ៍របស់ប្រទេសចិន និងជាឯកអគ្គរដ្ឋទូតប្រចាំការិយាល័យអង្គការសហប្រជាជាតិ (UN) នៅទីក្រុងហ្សឺណែវ និងអង្គការអន្តរជាតិផ្សេងទៀត នៅប្រទេសស្វីស។

សេចក្តីថ្លែងការណ៍រួម បានចង្អុលបង្ហាញថា ការលុបបំបាត់ភាពក្រីក្រ គឺអាស្រ័យលើការការពារសិទ្ធិធ្វើការងាររបស់មនុស្សគ្រប់រូប និងសិទ្ធិក្នុងការអភិវឌ្ឍ។ សេចក្តីថ្លែងការណ៍រួមបានរៀបរាប់​​ថា៖ «យើងប្រឆាំងយ៉ាងម៉ឺងម៉ាត់ ចំពោះការ​ប្រើប្រាស់​កម្លាំងពលកម្មដោយបង្ខំ។ ក្នុងពេលជាមួយគ្នានេះ យើងក៏មានក្ដី​បារម្ភយ៉ាងខ្លាំងអំពី និងប្រឆាំងយ៉ាងម៉ឺងម៉ាត់ ចំពោះការ​ដាក់​អត្រា​ពន្ធបន្ថែម លើសេដ្ឋកិច្ចផ្សេងទៀត ដោយផ្អែកលើការចោទប្រកាន់ជា​ឯកតោភាគី ដែលលើក​ឡើង​ពីការបរាជ័យ ក្នុងការទប់ស្កាត់ការនាំចូលទំនិញដែលផលិតដោយអ្វីដែលហៅថា ការ​ប្រើប្រាស់​កម្លាំងពលកម្មដោយបង្ខំ»។

សេចក្តីថ្លែងការណ៍រួមនេះ បាន​បន្តថា៖ «ការដំឡើង​ពន្ធ​ដោយបំពាន ក្រោមលេសនៃវិធានការប្រឆាំងនឹងកម្លាំងពលកម្មដោយបង្ខំ នឹងរំលោភលើសិទ្ធិក្នុងការអភិវឌ្ឍ និងសិទ្ធិទទួលបាន​ការងារសមរម្យរបស់កម្មករដែលប្រឹងប្រែងធ្វើការ។ ការអនុវត្តបែបនេះអាចធ្វើឲ្យ​ខ្សែច្រវាក់​ផ្គត់ផ្គង់ឧស្សាហកម្មសកលមិនមានស្ថិរភាព និងប៉ះពាល់​ដល់កិច្ចប្រឹងប្រែងរួមគ្នា ដើម្បីលុបបំបាត់ភាពក្រីក្រ»។

សេចក្តីថ្លែងការណ៍រួមបានសង្កត់ធ្ងន់ថា ចិនជំរុញឲ្យ​ប្រទេសពាក់ព័ន្ធគោរពការពិត ជៀសវាងការធ្វើនយោបាយ លើបញ្ហាពាណិជ្ជកម្ម និងការប្រើប្រាស់សិទ្ធិមនុស្សជាអាវុធ រក្សាសណ្តាប់ធ្នាប់សេដ្ឋកិច្ច និងពាណិជ្ជកម្មអន្តរជាតិ និងចូលរួមចំណែកដល់ការអភិវឌ្ឍពិភពលោកតាមរយៈសកម្មភាពជាក់ស្តែង៕