ប្រធានាធិបតីចិន លោក ស៊ី ជីនពីង (Xi Jinping) បានជួបជាមួយនាយករដ្ឋមន្ត្រីបង់ក្លាដែស លោក Tarique Rahman នៅទីក្រុងប៉េកាំង នា​ថ្ងៃសុក្រ (ទី២៦ ខែមិថុនា ឆ្នាំ២០២៦) នេះ ដោយក្នុង​ឱកាស​នោះ លោក​បាន​ផ្ដល់​ការ​សន្យាថា នឹងលើកកម្ពស់ទំនាក់ទំនងទ្វេភាគីឲ្យ​ដល់កម្រិតកាន់តែ​ខ្ពស់។

លោក ស៊ី បានថ្លែង​ថា ប្រទេសចិនត្រៀមជាស្រេច ដើម្បីគាំទ្រលោក Rahman ក្នុងការគ្រប់គ្រងប្រទេស និងដឹកនាំបង់ក្លាដែសឲ្យ​ឆ្ពោះទៅរកសមិទ្ធផលថ្មីៗ ក្នុងដំណើរអភិវឌ្ឍជាតិ។ ហើយ​លោក ស៊ី បានប្រាប់លោក Rahman ថា ប្រទេសចិនត្រៀមជាស្រេច ដើម្បីធ្វើការជាមួយបង់ក្លាដែស ដើម្បីប្រកាសពីការកសាងសហគមន៍ចិន-បង់ក្លាដែស ដែលមានអនាគតរួមគ្នា សម្រាប់យុគសម័យថ្មី។

បញ្ហាជាច្រើនទាក់ទងនឹងទំនាក់ទំនងបង់ក្លាដែស-ចិន រួមទាំងពាណិជ្ជកម្ម វិនិយោគ ហេដ្ឋារចនាសម្ព័ន្ធ ការតភ្ជាប់ និងវិស័យផ្សេងៗទៀតដែលផ្ដល់​ផលប្រយោជន៍ឲ្យ​គ្នា​ទៅវិញទៅមក ត្រូវបានពិភាក្សានៅក្នុងជំនួប​នេះ។

កិច្ចប្រជុំនេះធ្វើឡើង មួយថ្ងៃបន្ទាប់ពីលោក Rahman បានជួបពិភាក្សាទ្វេភាគីជាមួយនាយករដ្ឋមន្ត្រីចិន លោក Li Qiang នៅមហាសាល​ប្រជាជនចិន។ ភាគីទាំង២ បានពិភាក្សាអំពីពាណិជ្ជកម្ម វិនិយោគ និងកិច្ចសហប្រតិបត្តិការអភិវឌ្ឍ និងបានធ្វើជាសាក្សីនៃការចុះហត្ថលេខាលើអនុស្សរណៈយោគយល់គ្នា (MOU) ចំនួន ១៣។

លោកនាយករដ្ឋមន្ត្រី Rahman គ្រោងនឹងចេញដំណើរវិល​ត្រលប់​ទៅប្រទេស​វិញ នៅម៉ោង ៥:០០ល្ងាច ម៉ោងក្នុងស្រុក ជា​ការ​បញ្ចប់ដំណើរទស្សនកិច្ចរយៈពេល ៤ថ្ងៃរបស់លោក នៅ​ប្រទេសចិន៕