អ្នកការទូតជាន់ខ្ពស់របស់ក្រសួងការបរទេសអាមេរិក ទទួលបន្ទុកកិច្ច​ការ​តំបន់​អាស៊ីបូព៌ា បាននិយាយកាលពីថ្ងៃ​ព្រហស្បតិ៍ (ទី២៥ ខែមិថុនា ឆ្នាំ២០២៦) ថា ការជូនដំណឹង អំពីការលក់អាវុធដែលកំពុងរង់ចាំការសម្រេច ទៅកាន់សភា សម្រាប់កោះ​តៃវ៉ាន់ មិនអាស្រ័យលើការពិភាក្សាជាមួយប្រទេសចិនទេ ទោះបីជាមានការលើកឡើងពីប្រធានាធិបតី លោក Donald Trump ក៏ដោយ។

លោក Trump បានបង្កើត​ឲ្យមាន​ការភាន់ច្រឡំម្តងហើយម្តងទៀត អំពីកញ្ចប់លក់​អាវុធតម្លៃ ១៤ពាន់លានដុល្លារទៅ​ឲ្យ​កោះ​តៃវ៉ាន់ ដែលមានបំណងលើក​កម្ពស់​ការការពារ​របស់កោះនេះ ប្រឆាំងនឹងវិធាន​យោធារបស់ចិន ដោយបាននិយាយកាលពីខែឧសភាថា លោកបានពិភាក្សាអំពីបញ្ហានេះ នៅក្នុងកិច្ចប្រជុំជាមួយមេដឹកនាំចិន លោក Xi Jinping។

នៅពេលត្រូវបាន​សួរអំឡុងសវនាការអនុគណៈកម្មាធិការកិច្ចការបរទេសរបស់សភា ដើម្បីបញ្ជាក់ថា ការសម្រេចចិត្ត អំពី​ថា តើត្រូវជំរុញការលក់អាវុធនេះដែរ ឬអត់នោះ មិនអាស្រ័យលើការចរចាជាមួយទីក្រុងប៉េកាំងទេ ជំនួយការ​រដ្ឋមន្ត្រីការបរទេស ទទួលបន្ទុកកិច្ចការតំបន់​អាស៊ីបូព៌ា និងប៉ាស៊ីហ្វិក លោក Michael DeSombre បាននិយាយថា នោះគឺ​ជារឿង​ «ត្រឹម​ត្រូវ»។

លោក DeSombre ដែលត្រូវបានតែងតាំងសម្រាប់តំណែងនេះ ដោយលោក Trump បានបន្ថែមថា ការធានាចំនួន ៦ នៅតែដឹកនាំគោលនយោបាយរបស់សហរដ្ឋអាមេរិក។ តែយ៉ាង​ណាក្ដី លោក DeSombre មិនបានផ្តល់ពេលវេលា សម្រាប់ការសម្រេចចិត្ត លើកញ្ចប់លក់​អាវុធនេះ​ទេ ជាអ្វីដែលលោកបាននិយាយថា នៅតែស្ថិតក្រោមការពិនិត្យដោយលោក Trump៕