រដ្ឋមន្ត្រីក្រសួងការពារជាតិ លោក Ahn Gyu-back បាននិយាយនៅ​ថ្ងៃសុក្រ (ទី២៦ ខែមិថុនា ឆ្នាំ២០២៦) នេះថា កូរ៉េខាងត្បូងនឹងពង្រីកយ៉ាងឆាប់រហ័សនូវ​សមត្ថភាពយានដ្រូន និងប្រឆាំងយានដ្រូន​របស់ខ្លួន ដើម្បីទប់ទល់នឹងកូរ៉េខាងជើង ក្នុង​នោះ​រួមមាន​ទាំងការបណ្តុះបណ្តាល «អ្នកចម្បាំងយានដ្រូន» ចំនួន ៥០០.០០០នាក់ និងចែកចាយប្រព័ន្ធយានដ្រូន​រាប់ម៉ឺនគ្រឿង នៅទូទាំងអង្គភាពជួរមុខ ។

លោក Ahn បានបញ្ជាក់​ថា យោធាមានគម្រោងផលិតយានដ្រូនចំនួន ១១០.០០ គ្រឿង នៅឆ្នាំ២០២៩ សម្រាប់ដាក់ពង្រាយ នៅទូទាំងកងទ័ពជើងគោក ជើងទឹក អាកាស និងកងម៉ារីន ប៉ុន្តែក្រោយមកក្រសួងបានកែសម្រួលចំនួននេះត្រឹម​ប្រហែល ៦០.០០០គ្រឿង ដោយក្នុង​រង្វង់​ប្រមាណ​ ១១.០០០គ្រឿង នឹងត្រូវបានបង្ហាញ​នៅឆ្នាំ២០២៦។

ក្រសួង​បានឲ្យ​ដឹង​ទៀត​ថា ប្រព័ន្ធទាំងនេះនឹងត្រូវបានចេញនៅទូទាំងសេវាកម្មនានា ដោយមានគោលបំណងធ្វើឲ្យ​យានដ្រូន​ក្លាយជាយុទ្ធោបករណ៍ស្តង់ដារសម្រាប់ទាហាន។ ហើយ​លោក Ahn បានបន្ថែម​ថា ទីក្រុងសេអ៊ូលនឹងពឹងផ្អែកលើគ្រឿងបន្លាស់ផលិតក្នុងស្រុក ១០០ភាគរយ​ ជាជាងគ្រឿងបន្លាស់របស់ចិន ក្នុងការផលិត​ប្រព័ន្ធនេះ​ ដើម្បីឆ្លើយតបទៅនឹងក្ដី​បារម្ភអំពីសន្តិសុខ។

គួរ​បញ្ជាក់​ថា ការប្រកាសនេះកើតឡើងនៅពេលដែលកូរ៉េទាំង២ បង្កើនល្បឿនកិច្ចប្រឹងប្រែងកសាងសមត្ថភាពយានដ្រូន​ ដែលរៀន​សូត្រ​ពី​មេរៀន ក្នុង​ជម្លោះ នៅប្រទេស​អ៊ុយក្រែន និងតំបន់​មជ្ឈិមបូព៌ា ជាកន្លែងដែលប្រព័ន្ធយានដ្រូន​បានលេចឡើងក្លាយ​ជា​អាវុធ​ផ្លាស់ប្ដូរ​ស្ថានភាពនៅលើសមរភូមិ៕