ប្រធានទីភ្នាក់ងារថាមពលអាតូមិកអន្តរជាតិ (IAEA) នៅ​ថ្ងៃសុក្រ (ទី២៦ ខែមិថុនា ឆ្នាំ២០២៦) នេះ​ បានប្រាប់​ថា កិច្ចព្រមព្រៀងថ្មីៗនេះ រវាងសហរដ្ឋអាមេរិក និងអ៊ីរ៉ង់ ផ្តល់ការទទួលខុសត្រូវដល់អង្គការឃ្លាំមើលនុយក្លេអ៊ែររបស់អង្គការសហប្រជាជាតិមួយ​នេះ​ ដើម្បី​ត្រួតពិនិត្យការប្តេជ្ញាចិត្តនុយក្លេអ៊ែររបស់អ៊ីរ៉ង់។

អំឡុង​ពេល​និយាយ​ទៅកាន់អ្នកសារ​ព័ត៌មាននៅទីក្រុងតូក្យូ ប្រទេស​ជប៉ុន អគ្គនាយក IAEA លោក Rafael Grossi បានបញ្ជាក់​ថា អនុស្សរណៈនៃការយោគយល់គ្នា (MOU) រវាងទីក្រុងវ៉ាស៊ីនតោន និងតេអេរ៉ង់ «បង្ហាញជាពិសេស» ថា សមាសធាតុនុយក្លេអ៊ែររបស់អ៊ីរ៉ង់​ «នឹងត្រូវបានត្រួតពិនិត្យដោយ IAEA»។ លោក Grossi បានបន្ថែម​ថា៖ «ដើម្បីត្រួតពិនិត្យ យើងត្រូវធ្វើ​អធិការកិច្ច​។ គ្មានវិធីផ្សេងទៀតទេ»។

ជាមួយ​គ្នា​នេះ លោកបាននិយាយទៀត​ថា ទីភ្នាក់ងារនេះបានចាប់ផ្តើមការងារបច្ចេកទេស ជាមួយអាជ្ញាធរអ៊ីរ៉ង់រួចហើយ ហើយសង្ឃឹមថា នឹងទៅដល់អ៊ីរ៉ង់ «ឆាប់ៗនេះ» ដោយបន្ថែមថា សេចក្តីថ្លែងការណ៍សាធារណៈខុសគ្នា ដោយសហរដ្ឋអាមេរិក និងអ៊ីរ៉ង់ ឆ្លុះបញ្ចាំងពី «ជំហរនយោបាយ»។

លោកបានលើកឡើង​ថា «មានសង្រ្គាមសេចក្តីថ្លែងការណ៍» ដោយបាន​បន្ថែមថា កិច្ចព្រមព្រៀងនេះក៏គ្របដណ្តប់លើទណ្ឌកម្ម បូរណភាពទឹកដី ការប្រើប្រាស់កម្លាំង ការជំរុញ​សេដ្ឋកិច្ច និងសេរីភាពនៃការធ្វើនាវាចរណ៍ផងដែរ៕