នៅថ្ងៃសុក្រនេះ អតីតស្រ្តីទី ១កូរ៉េខាងត្បូងលោកស្រី Kim Keon Hee ត្រូវបានតុលាការកាត់ទោសឲ្យជាប់ពន្ធនាគាររយៈពេល ៧ឆ្នាំ សម្រាប់ការទទួលសំណូក ក្រោយតុលាការរកឃើញទោសកំហុសរបស់លោកស្រីទទួលយកគ្រឿងសម្ភារៈប្រណីតដូចជា គ្រឿងអលង្ការ និងកាបូបដៃ ជាការដោះដូរនឹងឥទ្ធិពលនយោបាយ ។

ចៅក្រមតុលាការស្រុកកណ្តាលក្រុងសេអ៊ូលនិយាយថា ភរិយារបស់លោកអតីតប្រធានាធិបតីកូរ៉េខាងត្បូង Yoon Suk Yeol ដែលត្រូវបានទម្លាក់ចេញពីតំណែងកាលពីឆ្នាំ ២០២៥ បន្ទាប់ពីការប៉ុនប៉ងពុំបានសម្រេចក្នុងការប្រកាសច្បាប់អាជ្ញាសឹក បានទទួលបានសំណូក មុនពេល និងអំឡុងពេលកាន់តំណែងប្រធានាធិបតីរបស់ស្វាមីលោកស្រី ។

ចៅក្រមរូបនេះ បញ្ជាក់ថា លោកស្រី Kim ប្រើអំណាចក្នុងនាមជាស្រ្តីទី ១ ដើម្បីផ្តល់ការងារ និងឥទ្ធិពលធុរកិច្ច ជាមួយនឹងការជួយមនុស្សឲ្យទទួលបានការងារក្នុងរដ្ឋាភិបាល ឬតំណែងក្នុងសភា ។

លោកបន្ត លោកស្រី Kim ទទួលសំណូកដោយគ្មានការស្ទាក់ស្ទើរ ដែលមនុស្សសាមញ្ញកម្រនឹងជួបប្រទះក្នុងឆាកជីវិតរបស់ពួកគេ ។

លោកនិយាយទៀតថា លោកស្រី Kim បានទទួលយកផងដែរអណ្តើកមាស កាបូប Dior នាឡិកាដៃ Vacheron Constantin តម្លៃ ៣៩លានវ៉ុន(ស្មើនឹង ២៥.៣៤៩ដុល្លារ) និងគំនូរតម្លៃ ១៤០លានវ៉ុន ៕