ដោយដកស្រង់ការស្ទង់មតិចុងក្រោយរបស់ស្ថាប័ន Gallup Korea ទីភ្នាក់ងារសារព័ត៌មាន Yonhap បានរាយការណ៍នៅថ្ងៃសុក្រ (ទី២៦ ខែមិថុនា ឆ្នាំ២០២៦) នេះ​ថា ប្រជាប្រិយភាព​របស់ប្រធានាធិបតីកូរ៉េខាងត្បូង លោក Lee Jae Myung បានធ្លាក់ចុះដល់កម្រិតទាបបំផុត ចាប់តាំងពីលោកចូលកាន់តំណែងក្នុងខែមិថុនាឆ្នាំមុន។

ការស្ទង់មតិលើមនុស្សពេញវ័យចំនួន ១.០០០នាក់ បានរកឃើញថា ការគាំទ្រ​ ចំពោះ​លោក Lee បានធ្លាក់ចុះ ៦ភាគរយ ពីកម្រិតកាលពី ២សប្តាហ៍មុន ដោយ​មកនៅ​ត្រឹម ៥១ភាគរយ​ ខណៈដែលការ​មិន​ពេញ​ចិត្តចំពោះ​រូប​លោក បានកើនឡើងដូចគ្នាដល់ ៤១ភាគរយ ជាលើកដំបូងដែលកម្រិត​បានលើសពី ៤០​ភាគរយ នៅក្នុងការស្ទង់មតិរបស់សា្ថប័ន Gallup។

អ្នកឆ្លើយតបបានលើកឡើងពីក្ដី​បារម្ភ អំពីសេដ្ឋកិច្ច គោលនយោបាយលំនៅឋាន​ និងភាពមិនប្រក្រតីដែលពាក់ព័ន្ធនឹងគណៈកម្មការរៀបចំការបោះឆ្នោតជាតិ ជាហេតុផលចម្បង សម្រាប់ការវាយតម្លៃអវិជ្ជមានរបស់ពួកគេ។

ជាមួយ​គ្នា​នេះ ការគាំទ្រ ចំពោះ​គណបក្សប្រជាធិបតេយ្យកូរ៉េ (Democratic Party of Korea) ដែលកំពុងកាន់អំណាច នៅតែមិនប្រែប្រួលនៅកម្រិត​ ៤១ភាគរយ​ ខណៈដែលប្រជាប្រិយ​ភាព​របស់​គណបក្សប្រឆាំងដ៏​សំខាន់ គឺគណបក្សអំណាចប្រជាជន (People Power Party) បានធ្លាក់ចុះ ២ភាគរយ មកត្រឹម ២៧ភាគរយ​។

ការស្ទង់មតិនេះត្រូវបានធ្វើឡើងចាប់ពីថ្ងៃអង្គារ ដល់ថ្ងៃព្រហស្បតិ៍ ហើយមាន​កម្រិត​ល្អៀង ៣,១ភាគរយ៕