ប្រទេសបែលហ្ស៊ិក បានចេញការប្រកាសអាសន្នកម្រិតពណ៌ក្រហម សម្រាប់រលកកម្តៅធ្ងន់ធ្ងរ ជាហេតុបង្កក្តីបារម្ភចំពោះផលិតកម្មសាច់ និងទឹកដោះគោ ស្របពេលបសុសត្វដូចជាសត្វគោ និងជ្រូក កំពុងជួបការលំបាក ក្នុងស្ថានភាពអាកាសធាតុក្តៅខ្លាំងបែបនេះ ។

សមាគមកសិកម្មបែលហ្ស៊ិក Boerenbond រំពឹងថា រលកកម្តៅនឹងកាត់បន្ថយផលិតកម្មទាំងទឹកដោះគោ និងសាច់ បើទោះបីជាពួកគេពុំទាន់អាចផ្តល់តួលេខច្បាស់លាស់ក៏ដោយ ។

លោក Sander Palmans វ័យ ៣៥ឆ្នាំ គឹជាប្រធានមន្ទីអប់រំ និងស្រាវជ្រាវកសិកម្ម និងជាកសិករមួយរូបនៅទីក្រុង Bocholt ស្ថិតនៅជិតព្រំដែនប្រទេសហូឡង់និយាយថា សត្វគោ និងជ្រូករបស់លោក បានរងផលប៉ះពាល់ខ្លាំងដោយសាររលកកម្តៅ ។

ស្របពេលដែលរូបលោកប្រើប្រាស់បច្ចេកទេសធ្វើឲ្យត្រជាក់ដូចជាកង្ហាជាដើម ដើម្បីជួយដល់សត្វ ចិញ្ចឹមរបស់លោក សីតុណ្ហភាពរហូតដល់ ៤០អង្សាសេ បច្ចេកទេសរបស់លោក លែងមានប្រសិទ្ធិភាពទៀតហើយ ។

លោក Palmans និយាយថា សត្វគោរបស់លោកលែងសូវរស់រវើកដូចកាលពីមុន ហើយពួកវាចូលចិត្តតែដេកប៉ុណ្ណោះ ដែលសកម្មភាពបែបនេះ នឹងនាំឲ្យការផលិតទឹកដោះមានតិច ។ ជ្រូក បានរងផលប៉ះពាល់ដូចគ្នា ការលូតដល់របស់វា ធ្លាក់ចុះទម្ងន់ ១៥០ក្រាមជារៀងរាល់ថ្ងៃ ធ្វើឲ្យកាត់បន្ថយទិន្នផលសាច់ ។

លោកថា រលកកម្តៅនេះ បានធ្វើឲ្យពួកយើងខាតបង់ថវិកា ១៥០-២០០ផោន ក្នុង ១ថ្ងៃ ដែលស្មើនឹង ១០-១៥ភាគរយនៃប្រាក់ចំណូលរបស់លោក ។

ក្រសួងកសិកម្មបែលហ្ស៊ិកនិយាយថា រលកកម្តៅ កំពុងបង្កផលប៉ះពាល់ដល់កសិករចិញ្ចឹមសត្វភាគច្រើន ស្របពេលដែលភ្លៀងធ្លាក់កាលពីពេលថ្មីៗនេះ មានន័យថា គ្រោះរាំងស្ងួតលែងក្លាយជាក្តីកង្វល់ធំទៀតហើយ សម្រាប់កសិករធ្វើចម្ការ ៕