គ្រោះរញ្ជួយដីថ្មីមួយផ្សេងទៀត ត្រូវបានគេឃើញនៅឆ្នេរសមុទ្រភាគខាងជើងប្រទេសវ៉េណេស៊ុយអេឡា ក្នុងកម្រិត ៤.៩ រ៉ិចទ័រ។ ការរញ្ជួយដីកាលពីថ្ងៃសុក្រ បានកើតឡើងប៉ុន្មានថ្ងៃបន្ទាប់ពីការរញ្ជួយដីដ៏ខ្លាំងក្លាពីរលើកបានវាយប្រហារប្រទេសនេះកាលពីល្ងាចថ្ងៃពុធ ដោយបានសម្លាប់មនុស្សយ៉ាងហោចណាស់ ៩២០នាក់ និងធ្វើឱ្យផ្នែកមួយចំនួននៅរដ្ឋធានីការ៉ាកាស រងការបំផ្លិចបំផ្លាញ។

អង្គការតាមដានការរញ្ជួយដី EMSC បាននិយាយនៅក្នុងការបង្ហោះសារនៅលើបណ្តាញផ្សព្វផ្សាយសង្គមថា ការរញ្ជួយដីចុងក្រោយ បានកើតឡើងនៅចម្ងាយ ៦១ គីឡូម៉ែត្រ ភាគពាយ័ព្យទីក្រុង Maracay ស្ថិតភាគខាងជើងប្រទេសវ៉េណេស៊ុយអេឡា។

ប្រទេសអាមេរិកខាងត្បូងមួយនេះ រងផលប៉ះពាល់ពីការរញ្ជួយដីពីរលើកកាលពីថ្ងៃពុធ ដែលលើកទីមួយមានកម្រិត ៧.២ និងមួយទៀតមានកម្រិត ៧.៥ រ៉ិចទ័រ។ ចំនួនអ្នកស្លាប់ត្រូវបានគេរំពឹងថានឹងកើនឡើង ដោយទីភ្នាក់ងារស្ទង់ភូមិសាស្ត្រសហរដ្ឋអាមេរិក បានប៉ាន់ប្រមាណថាចំនួនអ្នកស្លាប់អាចមានច្រើនរហូតដល់រាប់ពាន់នាក់។

ប្រជាជនបានរៀបចំប្រមូលសម្ភារៈ និងស្វែងរកអ្នកនៅរស់រានមានជីវិត ខណៈប្រជាជនមួយចំនួន បានប្រើប្រាស់រថយន្តរបស់ខ្លួនជារថយន្តសង្គ្រោះបន្ទាន់។ ទន្ទឹមនឹងនេះ រដ្ឋាភិបាលវ៉េណេស៊ុយអេឡាបានបន្ធូរបន្ថយការរឹតត្បិតវេទិកាបណ្តាញផ្សព្វផ្សាយសង្គមដូចជាបណ្តាញសង្គម X ដែលត្រូវបានរារាំងបន្ទាប់ពីការបោះឆ្នោតប្រធានាធិបតីឆ្នាំ២០២៤ ដែលមានភាពចម្រូងចម្រាស់។