សមាជិក​សភាជាន់ខ្ពស់អ៊ីរ៉ង់មួយ​រូប បាននិយាយនៅ​ថ្ងៃសៅរ៍ (ទី២៧ ខែមិថុនា ឆ្នាំ២០២៦) នេះ​ថា ការវាយប្រហាររបស់សហរដ្ឋអាមេរិកលើអ៊ីរ៉ង់ ក្នុងអំឡុងពេលចរចា បានបង្ហាញពីកង្វះការប្តេជ្ញាចិត្តរបស់ទីក្រុងវ៉ាស៊ីនតោន ចំពោះការទូត និងអនុស្សរណៈ​នៃ​ការយោគយល់គ្នា (MOU) លើ​បទឈប់បាញ់។

លោក Ibrahim Azizi ប្រមុខ​គណៈកម្មការសន្តិសុខជាតិ និងគោលនយោបាយការបរទេសរបស់សភា បាននិយាយថា សហរដ្ឋអាមេរិក «បានវាយប្រហារអ៊ីរ៉ង់ម្តងទៀត ក្នុង​ពេល​មាន​ដំណើរការ​ការចរចា»។ លោក Azizi បានបន្ត​ថា «ប្រធានាធិបតីបអាមេរិកដែល​បរាជ័យ បានបង្ហាញថា លោកមិនមានការប្តេជ្ញាចិត្ត ចំពោះគោលការណ៍នៃការចរចា ឬបទឈប់បាញ់ឡើយ​»។

លោកបានសង្កត់ធ្ងន់​ថា «ការរំលោភបំពានដោយមិនប្រុងប្រយ័ត្ន» លើ​បទឈប់បាញ់ នឹង «ដូចរាល់ដង នឹងនាំឱ្យមានការដើរ​ថយក្រោយ​​ និងការសោកស្តាយ» ចំពោះសហរដ្ឋអាមេរិក។ លោកបានបន្ថែមថា «ល្បែងស្តីបន្ទោស លែងមាន​ប្រសិទ្ធភាព​ទៀតហើយ»។

ការកត់សម្គាល់របស់លោកបែប​នេះ​បានកើតឡើងប៉ុន្មានម៉ោង បន្ទាប់ពីកងឆ្មាំបដិវត្តន៍ឥស្លាមអ៊ីរ៉ង់ (IRGC) បានឲ្យ​ដឹង​ថា កងកម្លាំងកងទ័ពជើងទឹករបស់ខ្លួន បានកំណត់គោលដៅទីតាំងយោធាអាមេរិកនៅទូទាំងតំបន់ ដើម្បីឆ្លើយតបទៅនឹងការវាយប្រហាររបស់អាមេរិក នៅភាគខាងត្បូងប្រទេស។

គួរបញ្ជាក់​ថា បញ្ជាការកណ្តាលយោធាអាមេរិក (CENTCOM) បានប្រាប់​កាលពីថ្ងៃសុក្រថា កងកម្លាំងអាមេរិក បានវាយប្រហារទីតាំងមីស៊ីល យានដ្រូន​ និងរ៉ាដារបស់អ៊ីរ៉ង់ បន្ទាប់ពីបាន​ចោទប្រកាន់ទីក្រុងតេអេរ៉ង់ថា ជាអ្នកនៅពីក្រោយការវាយប្រហារលើនាវាពាណិជ្ជកម្ម ១គ្រឿង ដែលឆ្លងកាត់ច្រកសមុទ្រ Hormuz៕