នៅថ្ងៃសៅរ៍ (ទី២៧ ខែមិថុនា ឆ្នាំ២០២៦) នេះ អ៊ីរ៉ង់បានថ្កោលទោសការវាយប្រហាររបស់សហរដ្ឋអាមេរិក លើទីតាំងជាច្រើន នៅ​តាមបណ្តោយឆ្នេរសមុទ្រភាគខាងត្បូងប្រទេស​ ដោយចោទប្រកាន់ទីក្រុងវ៉ាស៊ីនតោនថា បានរំលោភលើធម្មនុញ្ញអង្គការសហប្រជាជាតិ (UN) និងកតិកាសញ្ញាដែលទើបចុះហត្ថលេខាថ្មីៗនេះ ស្តីពីការបញ្ចប់សង្គ្រាម។

នៅក្នុងសេចក្តីថ្លែងការណ៍មួយ ក្រសួងការបរទេសអ៊ីរ៉ង់បានលើកឡើង​ថា ការវាយប្រហារទាំងនេះ បានកំណត់គោលដៅលើទីតាំង​តាម​ឃ្លាំមើលឆ្នេរសមុទ្រ និងបានអះអាង​ជាថ្មីនូវសិទ្ធិការពារខ្លួនរបស់អ៊ីរ៉ង់ ដោយបញ្ជាក់ថា កងកម្លាំងប្រដាប់អាវុធរបស់ខ្លួន បានធ្វើការវាយប្រហារសងសឹកលើគោលដៅដែលមានទំនាក់ទំនងជាមួយសហរដ្ឋអាមេរិក។

តាម​រយៈ​សេចក្ដី​ថ្លែង​ការណ៍នោះ ក្រសួងក៏បានជំរុញផង​ដែរ​ឱ្យរដ្ឋឈូងសមុទ្រ «រារាំង​ភាគីឈ្លានពានណាមួយកុំ​ឲ្យ​ប្រើប្រាស់ទឹកដី និងទីតាំង​របស់ពួកគេ ដើម្បីអនុវត្តសកម្មភាពឈ្លានពាន» លើ​ទីក្រុងតេអេរ៉ង់។ ហើយ​ក្រសួង​ក៏បានអំពាវនាវដែរ​ដល់ UN និងស្ថាប័នអន្តរជាតិនានា «កុំឱ្យព្រងើយកន្តើយ ចំពោះការរំលោភបំពានយ៉ាងច្បាស់ក្រឡែត​» លើ​ច្បាប់អន្តរជាតិនេះ​។

សហរដ្ឋអាមេរិក បានឲ្យ​ដឹង​កាលពីថ្ងៃសុក្រថា កងកម្លាំងរបស់ខ្លួន បានវាយប្រហារទីតាំងមីស៊ីល យានដ្រូន និងរ៉ាដារបស់អ៊ីរ៉ង់ បន្ទាប់ពីបាន​ចោទប្រកាន់ទីក្រុងតេអេរ៉ង់ថា នៅពីក្រោយការវាយប្រហារលើនាវាពាណិជ្ជកម្ម ១គ្រឿង ដែលឆ្លងកាត់ច្រកសមុទ្រ Hormuz។ ក្រោយមក ជាការ​ឆ្លើយ​តប កងឆ្មាំបដិវត្តន៍ឥស្លាមអ៊ីរ៉ង់ (IRGC) បានប្រាប់​ថា កងកម្លាំងជើងទឹករបស់ខ្លួន បានកំណត់គោលដៅទីតាំងយោធាអាមេរិក នៅទូទាំងតំបន់ នៅភាគខាងត្បូងប្រទេស ហើយបានសន្យាឆ្លើយតបយ៉ាងម៉ឺងម៉ាត់ ប្រសិនបើស្ថានភាព​នេះ​នៅតែបន្តមាន​៕