លោកប្រធានាធិបតី Volodymyr Zelenskyy នៅ​ថ្ងៃសៅរ៍ (ទី២៧ ខែមិថុនា ឆ្នាំ២០២៦) នេះ​ បានប្រាប់​ឲ្យដឹង​ថា មីស៊ីលរយៈចម្ងាយឆ្ងាយ Flamingo FP-5 ផលិតដោយប្រទេស​អ៊ុយក្រែន «បានវាយប្រហារដោយជោគជ័យ» លើ​រោងចក្រឧស្សាហកម្មយោធាដ៏​សំខាន់មួយរបស់រុស្ស៊ី នៅក្នុងទីក្រុង Volgograd នាពេល​យប់​។

ការវាយប្រហារនេះផ្តោតលើមជ្ឈមណ្ឌលស្រាវជ្រាវ និងផលិតសហព័ន្ធរបស់រុស្ស៊ី Titan-Barrikady ដែលជាសហគ្រាសការពារជាតិដ៏ធំ​មួយដែលផលិតជើង​ទម្របាញ់​ប្រព័ន្ធមីស៊ីលយុទ្ធសាស្ត្រ Yars និង Topol-M ក៏ដូចជាជើង​ទម្របាញ់ប្រព័ន្ធមីស៊ីលបាលីស្ទិក Iskander-M។

លោក Zelenskyy បាននិយាយថា៖ «ការវាយប្រហារដែលត្រូវបានបញ្ជាក់នេះ​ បាន​ធ្វើ​ឲ្យ​មាន​អគ្គិ​ភ័យនៅបរិវេណរោងចក្រនេះ​។ វាគឺជាទីកន្លែង​ប្រមូលផ្ដុំ​អគារ​ឧស្សាហកម្មដ៏សំខាន់មួយដែល (រុស្ស៊ី) ផលិតប្រព័ន្ធកាំភ្លើងធំ និងឧបករណ៍យោធាឯកទេស ក្នុង​នោះ​រួមមាន​ទាំងគ្រឿងបន្លាស់ សម្រាប់ប្រព័ន្ធបាញ់មីស៊ីលដែលប្រើក្នុងការវាយប្រហារលើ​ប្រជាជនរបស់យើងផង​ដែរ​»។

អភិបាលតំបន់​ Volgograd Oblast លោក Andrey Bocharov បានបញ្ជាក់ថា «ការវាយប្រហារ​ពី​លើ​អាកាស» របស់អ៊ុយក្រែន បានដាក់​គោល​ដៅ​ទីក្រុងនេះពេញមួយយប់ ដោយបំផ្លាញអ្វីដែលលោកពិពណ៌នាថា ជា «រោងចក្រផលិតនៅសហគ្រាសមួយរបស់ទីក្រុង​ Volgograd ក្នុងតំបន់ Krasnooktyabrsky»។

ទោះបីជាលោក Bocharov មិនបានកំណត់អត្តសញ្ញាណសហគ្រាសតាមឈ្មោះក៏ដោយ ក៏រោង​ចក្រ​ Titan-Barrikady មានទីតាំងនៅក្នុងតំបន់​នេះ​។ អភិបាលតំបន់​រូប​នេះ​បានបញ្ជាក់​បន្ថែម​ថា មនុស្សយ៉ាង​តិច​ ១០​នាក់បានរងរបួស ហើយ​កំពុងទទួលការព្យាបាល។ លោកបានបន្ថែមថា អគ្គិភ័យក្នុងតំបន់ ត្រូវបានពន្លត់យ៉ាងឆាប់រហ័ស ហើយគ្មានអគារលំនៅឋាន​ណាមួយ រង​ខូចខាតឡើយ​៕