អ៊ីរ៉ង់បានឲ្យដឹង​ថា ខ្លួនបានវាយប្រហារគោលដៅដែលមានទំនាក់ទំនងជាមួយកងកម្លាំងសហរដ្ឋអាមេរិក នៅ​ថ្ងៃសៅរ៍ (ទី២៧ ខែមិថុនា ឆ្នាំ២០២៦) នេះ​ ដើម្បីជា​ការ​ឆ្លើយតបទៅនឹងការវាយប្រហារពី​លើ​អាកាសរបស់អាមេរិក នៅឆ្នេរសមុទ្រភាគខាងត្បូងប្រទេស​ ខណៈដែលភាគីម្ខាងៗ​បន្តចោទប្រកាន់គ្នាទៅវិញទៅមកថា បានរំលោភលើកិច្ចព្រមព្រៀងកាលពីសប្តាហ៍មុន ជាកតិកាសញ្ញាដែលមានបំណង​បញ្ចប់សង្គ្រាមរយៈពេល ៤ខែ។

យ៉ាង​ណាក្ដី ក្រសួងការបរទេសអ៊ីរ៉ង់មិនបានបង្ហាញ​ទីតាំងនៃការវាយប្រហារ «ការពារ» របស់ខ្លួនឡើយ​ ដែលខ្លួនបានអះអាង​ថា ជាការឆ្លើយតបទៅនឹង «ការវាយប្រហារតាមអាកាសដ៏ព្រៃផ្សៃ» ដោយសហរដ្ឋអាមេរិក លើទីកន្លែង​​ឃ្លាំមើលឆ្នេរសមុទ្ររបស់ខ្លួន ជា​អ្វី​ដែលទីក្រុង​តេអេរ៉ង់បានបញ្ជាក់ថា ក៏បានរំលោភផង​ដែរ​លើធម្មនុញ្ញអង្គការសហប្រជាជាតិ (UN)។

បន្ទាប់​មក បារ៉ែន ដែលជាទីតាំង​ឈរ​ជើង​នៃ​កងនាវាទី៥ របស់កងទ័ពជើងទឹកសហរដ្ឋអាមេរិក បានថ្កោលទោស ចំពោះ​អ្វីដែលខ្លួនប្រាប់​​ថា ជាការវាយប្រហារដោយយានដ្រូន​របស់អ៊ីរ៉ង់ លើទឹកដីរបស់ខ្លួន ដោយ​បាន​ចាត់​ទុក​ថា ជាការរំលោភបំពានយ៉ាងធ្ងន់ធ្ងរ លើអធិបតេយ្យភាព និងជាការគំរាមកំហែងដល់សន្តិសុខរបស់ខ្លួន ដោយបន្ថែមថា ខ្លួនរក្សាសិទ្ធិក្នុងការការពារខ្លួន។

ទីក្រុងវ៉ាស៊ីនតោនមិនបានឆ្លើយតបភ្លាមៗឡើយ ចំពោះរបាយការណ៍របស់អ៊ីរ៉ង់ អំពីការវាយប្រហារគោលដៅអាមេរិក ជាយុទ្ធសាស្ត្រមួយដែលបានព្យាយាមធ្វើឱ្យសម្ព័ន្ធមិត្តរបស់សហរដ្ឋអាមេរិក នៅក្នុងតំបន់ចុះខ្សោយ អំឡុងជម្លោះនេះ​។ ចំណែក​យោធាសហរដ្ឋអាមេរិកបានឲ្យ​ដឹង​ថា ការវាយប្រហាររបស់ខ្លួន កាល​ពី​ថ្ងៃសុក្រ គឺជាការឆ្លើយតបទៅនឹងការវាយប្រហារដោយយានដ្រូន​របស់អ៊ីរ៉ង់ លើនាវាដឹកទំនិញ ១គ្រឿង នៅក្នុងច្រកសមុទ្រ Hormuz ដែលជាផ្លូវទឹកដ៏សំខាន់សម្រាប់ការផ្គត់ផ្គង់ថាមពលពិភពលោក។

ទូរទស្សន៍រដ្ឋអ៊ីរ៉ង់បានរាយការណ៍​ថា ឆ្មាំបដិវត្តន៍របស់ប្រទេសនេះ បានផ្តល់ «ការឆ្លើយតបយ៉ាងម៉ឺងម៉ាត់» បន្ទាប់ពីកងកម្លាំងអាមេរិក បានវាយប្រហារប៉មទំនាក់ទំនងមួយ នៅក្នុងទីក្រុងកំពង់ផែ Sirik។ ហើយ​ទីភ្នាក់ងារសារព័ត៌មាន Mehr របស់អ៊ីរ៉ង់ បានឲ្យ​ដឹង​ថា កំពង់ផែនេះកំពុងដំណើរការធម្មតា ដោយគ្មានការខូចខាតណាមួយត្រូវបានរាយការណ៍ឡើយ​ សម្រាប់​គ្រឿងបរិក្ខារ ឬឧបករណ៍​ផ្សេងៗ៕