នាវាដឹកប្រេងមួយគ្រឿង ត្រូវបានគេរាយការណ៍ថា រងការវាយប្រហារដោយកាំជ្រួចផ្លោងនៅច្រកសមុទ្រ Hormuz ។

ទីភ្នាក់ងារសន្តិសុខសមុទ្រអង់គ្លេស រាយការណ៍ថា នាវាដឹកប្រេងមួយគ្រឿងនេះ រងការខូចខាតមួយចំនួន ប៉ុន្តែនាវិករបស់ពួកគេ ពុំមានគ្រោះថ្នាក់នោះទេ ។

ឧបទ្ទេវហេតុកាលពីថ្ងៃសៅរ៍នេះដែរ បានកើតមានឡើង បន្ទាប់ពីសហរដ្ឋអាមេរិក បានបើកការវាយប្រហារអ៊ីរ៉ង់កាលពីថ្ងៃសុក្រ ជាការឆ្លើយតបចំពោះការវាយប្រហារយានដ្រូនរបស់អ៊ីរ៉ង់លើនាវាដឹកទំនិញមួយគ្រឿងនៅច្រកសមុទ្រ Hormuz ។

អ៊ីរ៉ង់ពុំបានធ្វើសេចក្តីអត្ថាធិប្បាយដោយផ្ទាល់នោះទេចំពោះសេចក្តីរាយការណ៍នៃការវាយប្រហារលើនាវាដឹកទំនិញ ប៉ុន្តែទូរទស្សន៍រដ្ឋអ៊ីរ៉ង់រាយការណ៍ថា ឆ្មាំបដិវត្តន៍របស់ខ្លួន បានបាញ់ព្រមាននាវាដែលព្យាយាមឆ្លងកាត់ច្រកសមុទ្រដោយពុំមានការអនុញ្ញាតពីទីក្រុងតេអេរ៉ង់ ។

អ៊ីរ៉ង់បានថ្កោលទោសការវាយប្រហាររបស់សហរដ្ឋអាមេរិក លើទីតាំងជាច្រើន នៅតាមបណ្តោយឆ្នេរសមុទ្រភាគខាងត្បូងប្រទេសរបស់ខ្លួន ដោយចោទប្រកាន់ទីក្រុងវ៉ាស៊ីនតោនថា បានរំលោភលើធម្មនុញ្ញអង្គការសហប្រជាជាតិ (UN) និងកតិកាសញ្ញាដែលទើបចុះហត្ថលេខាថ្មីៗនេះ ស្តីពីការបញ្ចប់សង្គ្រាម ។

នៅក្នុងសេចក្តីថ្លែងការណ៍មួយ ក្រសួងការបរទេសអ៊ីរ៉ង់បានលើកឡើងថា ការវាយប្រហារទាំងនេះ បានកំណត់គោលដៅលើទីតាំងឃ្លាំមើលឆ្នេរសមុទ្រ ហើយពួកគេបានអះអាងជាថ្មីម្តងទៀតនូវសិទ្ធិការពារខ្លួនរបស់អ៊ីរ៉ង់ ក្នុងការវាយប្រហារសងសឹកលើគោលដៅដែលមានទំនាក់ទំនងជាមួយសហរដ្ឋអាមេរិក ។

សហរដ្ឋអាមេរិក និយាយថា កងកម្លាំងរបស់ខ្លួន បានវាយប្រហារទីតាំងមីស៊ីល យានដ្រូន និងរ៉ាដារបស់អ៊ីរ៉ង់ បន្ទាប់ពីបានចោទប្រកាន់ថា ទីក្រុងតេអេរ៉ង់ថា នៅពីក្រោយការវាយប្រហារលើនាវាពាណិជ្ជកម្ម ១គ្រឿង ដែលឆ្លងកាត់ច្រកសមុទ្រ Hormuz។

ជាការតបត កងឆ្មាំបដិវត្តន៍ឥស្លាមអ៊ីរ៉ង់ បានកំណត់គោលដៅទីតាំងយោធាអាមេរិក នៅទូទាំងតំបន់ នៅភាគខាងត្បូងប្រទេស ហើយបានសន្យាឆ្លើយតបយ៉ាងម៉ឺងម៉ាត់ ប្រសិនបើស្ថានភាពនេះនៅតែបន្តមាន៕