យោងតាមសេចក្តីថ្លែងការណ៍រួមរបស់នាយករដ្ឋមន្ត្រី និងរដ្ឋមន្ត្រីការពារជាតិអ៊ីស្រាអែល កាលពីថ្ងៃអាទិត្យ ទី២៨ ខែមិថុនា យោធាអ៊ីស្រាអែលបានបំផ្លាញហេដ្ឋារចនាសម្ព័ន្ធក្រោមដីដែលត្រូវបានប្រើប្រាស់ដោយក្រុមសកម្មប្រយុទ្ធហេសបូឡាលីបង់នៅក្នុងភូមិមួយនៅភាគខាងត្បូងប្រទេសលីបង់។

យោងតាមសេចក្តីថ្លែងការណ៍របស់នាយករដ្ឋមន្ត្រីអ៊ីស្រាអែល Benjamin Netanyahu និងរដ្ឋមន្ត្រីការពារជាតិ លោក Israel Katz បាននិយាយឲ្យដឹងថា សហរដ្ឋអាមេរិកត្រូវបានផ្តល់ដំណឹងនៅមុនការវាយប្រហារ ដែលបានកំណត់គោលដៅលើផ្លូវរូងក្រោមដីប្រវែង២០០ម៉ែត្រក្នុងទីក្រុង Majdal Zoun ។

សេចក្តីថ្លែងការណ៍របស់អ៊ីស្រាអែលនិយាយថា ផ្លូវរូងក្រោមដីនេះមានអាវុធ និងជើងទម្រសម្រាប់បាញ់រាប់រយគ្រឿង។ ការវាយប្រហារ បានកើតឡើងប៉ុន្មានម៉ោងបន្ទាប់ពីយោធាអ៊ីស្រាអែលនិយាយថា ខ្លួនបានវាយប្រហារក្រុមសកម្មប្រយុទ្ធហេសបូឡាប្រដាប់ដោយគ្រាប់បែកជំរុញដោយរ៉ូកែតនិងបានវាយប្រហារជើងទម្របាញ់រ៉ូកែតក្នុងតំបន់ Nabatieh ភាគខាងត្បូងប្រទេសលីបង់។ ក្រុមហេសបូឡា បាននិយាយនៅព្រឹកថ្ងៃចន្ទនេះថា ការវាយប្រហាររបស់អ៊ីស្រាអែលគឺជាការរំលោភជាក់ស្តែងលើបទឈប់បាញ់ដែលខ្លួនបានប្រកាន់ខ្ជាប់រហូតមកដល់ពេលនេះ ដោយនិយាយបន្ថែមថា ខ្លួនកំពុងតាមដានយ៉ាងដិតដល់នូវការរំលោភបំពាននិងរក្សាសិទ្ធិក្នុងការ «ការពារមាតុភូមិ និងប្រជាជនរបស់ខ្លួន»។ កិច្ចព្រមព្រៀងសន្តិសុខសម្របសម្រួលដោយសហរដ្ឋអាមេរិកដែលបានព្រមព្រៀងគ្នារវាងលីបង់និងអ៊ីស្រាអែល កាលពីថ្ងៃសុក្រសប្តាហ៍កន្លងទៅនេះ ដែលបែងចែកសម្រាប់ការដកកងទ័ពអ៊ីស្រាអែលជាដំណាក់កាលចេញពីតំបន់មួយចំនួននៅភាគខាងត្បូងប្រទេសលីបង់ រួមជាមួយការដាក់ពង្រាយកងទ័ពលីបង់។ ប៉ុន្តែកងកម្លាំងអ៊ីស្រាអែលនឹងត្រូវបានអនុញ្ញាតឱ្យស្ថិតនៅក្នុងតំបន់សន្តិសុខដែលត្រូវបានពង្រីកសម្រាប់ពេលបច្ចុប្បន្ន។ មេដឹកនាំក្រុមហេសបូឡា លោក Naim Qassem បានច្រានចោលកិច្ចព្រមព្រៀងនេះ ដោយចាត់ទុកថាវាជាការចុះចាញ់អ៊ីស្រាអែល។ លោកនិយាយថា ក្រុមនេះនឹងបន្តការតតាំងប្រដាប់អាវុធ។