សារព័ត៌មាន​ Le Monde បាន​រាយការណ៍​នៅ​ថ្ងៃចន្ទ (ទី២៩ ខែមិថុនា ឆ្នាំ២០២៦) នេះ​ថា រដ្ឋាភិបាលបារាំងកំពុងប្រឈមនឹងការរិះគន់ពីគណបក្សប្រឆាំង ជុំវិញការដោះស្រាយជាមួយ​រលកកម្ដៅ​ថ្មីៗនេះ និងគោលនយោបាយអាកាសធាតុទូលំទូលាយរបស់ខ្លួន។

លោកនាយករដ្ឋមន្ត្រី Sebastien Lecornu គ្រោង​ធ្វើជាប្រធានកិច្ចប្រជុំវិបត្តិអន្តរក្រសួងលើកទី៤ នៅថ្ងៃចន្ទ ដើម្បីពិនិត្យឡើងវិញនូវការឆ្លើយតបរបស់រដ្ឋាភិបាល ចំពោះរលកកម្ដៅ​ក្ដៅបំផុត​ ដែលបានប៉ះពាល់ដល់ប្រទេសភាគច្រើន។

កិច្ចប្រជុំនេះបានកើតឡើងបន្ទាប់ពីសារព័ត៌មាន​ Sante publicique France បានរាយការណ៍ពីការស្លាប់ប្រមាណ ១.០០០នាក់ លើសពីចំនួន​អ្នកសា្លប់​ជា​មធ្យមភាគតាមរដូវកាល ចាប់តាំងពីថ្ងៃទី២៤ ខែមិថុនា ជាអ្វីដែលទីភ្នាក់ងារសារព័ត៌មាន​នេះ​បានពិពណ៌នាថា ជាការប៉ាន់ស្មានបឋម។

អ្នកនយោបាយប្រឆាំង បានចោទសួរ អំពីការឆ្លើយតបរបស់រដ្ឋាភិបាល បន្ទាប់ពីតួលេខត្រូវបានចេញផ្សាយ​។ លោកស្រី​ Marine Tondelier មេដឹកនាំគណបក្ស Greens បានអំពាវនាវឱ្យមានការទទួលខុសត្រូវខាងនយោបាយ ខណៈដែលលោក Jean-Philippe Tanguy មកពីគណបក្ស National Rally បាននិយាយថា ការស្លាប់ជាច្រើនអាចត្រូវបានការពារ។

រដ្ឋមន្ត្រីក្រសួងមហាផ្ទៃ លោក​ Laurent Nunez បានការពារការដោះស្រាយ​របស់រដ្ឋាភិបាល ជាមួយ​រលកកម្ដៅ។ លោកប្រធានាធិបតី Emmanuel Macron ក៏បានការពារកំណត់ត្រារបស់រដ្ឋាភិបាលរបស់លោកផងដែរ​ ជុំវិញគោលនយោបាយអាកាសធាតុ ដោយលើកឡើង​ថា ប្រទេសបារាំងបានអនុវត្ត «ការងារជាច្រើន» ដើម្បីកាត់បន្ថយការបំភាយឧស្ម័នកាបូន និងកែសម្រួល​ហេដ្ឋារចនាសម្ព័ន្ធសាធារណៈឲ្យ​ស្រប​ទៅនឹងបម្រែបម្រួល​អាកាសធាតុ ខណៈពេលដែលទទួលស្គាល់ថា «យើងមិនទាន់បានបញ្ចប់ការងារនេះនៅឡើយទេ»៕