ប្រធានាធិបតីទួរគី លោក​ Recep Tayyip Erdogan បញ្ជាក់​ថា ប្រទេស​ទួរ​គីត្រូវតែបាន​រួមបញ្ចូលនៅក្នុងរចនាសម្ព័ន្ធការពារជាតិ និងសន្តិសុខទាំងអស់របស់អឺរ៉ុប ដោយ​ការលើក​ឡើង​នេះកើតមាន​ឡើង​ត្រឹម​​មួយសប្តាហ៍មុនកិច្ចប្រជុំកំពូលដ៏សំខាន់របស់អង្គការ​ណាតូ (NATO) នៅទីក្រុង Ankara។

លោក Erdogan បានប្រាប់ប្រតិភូសភាមកពីរដ្ឋសមាជិកអង្គការ​ណាតូទាំង៣២ នៅទីក្រុងអ៊ីស្តង់ប៊ុលថា៖ «ក្នុងនាមជាប្រទេសមួយ ក្នុងចំណោមប្រទេសដែលមានសិទ្ធិអំណាច ក្នុងការអភិវឌ្ឍសសរស្តម្ភអឺរ៉ុបរបស់​សម្ព័ន្ធភាពនេះ​ យើងចង់ចូលរួមក្នុងគំនិតផ្តួចផ្តើមការពារជាតិ និងសន្តិសុខទាំងអស់ នៅទ្វីបនេះ​»។

លោក​បាន​និយាយ​ទៀត​ថា៖ «យើងរំពឹងមាន​ការគាំទ្រពីអ្នក ជាសមាជិកសភា ចំពោះការបញ្ចូលប្រទេសទួរគីទៅក្នុងគំនិតផ្តួចផ្តើមការពារជាតិ និងសន្តិសុខដែលត្រូវ​បានប្រកាសដោយសហភាពអឺរ៉ុប"។

ប្រទេសទួរគីបានស្វែងរកសមាជិកភាពសហភាពអឺរ៉ុប (EU) ជាយូរមកហើយ។ ហើយ​លោក Erdogan បន្ថែមថា អង្គការ​ណាតូត្រូវតែលុបបំបាត់ឧបសគ្គទាំងអស់ដែលរារាំងពាណិជ្ជកម្មឧស្សាហកម្មការពារជាតិ រវាងសមាជិកនៃសម្ព័ន្ធមិត្តយោធា។

លោកបានប្រាប់សមាជិក​សភា​ទាង​នោះ​ថា៖ «ប្រសិនបើយើងចង់យកឈ្នះលើបញ្ហាប្រឈមដែលយើងជួប​ប្រទះ​ យើងត្រូវលុបបំបាត់ឧបសគ្គ ចំពោះពាណិជ្ជកម្មឧស្សាហកម្មការពារជាតិ ខណៈពេលដែលធានាបាននូវការចែករំលែកបន្ទុកដែលមានតុល្យភាព និងយុត្តិធម៌ក្នុងចំណោមសម្ព័ន្ធមិត្ត»៕