ភ្នំពេញ៖ ក្រសួងពាណិជ្ជកម្ម កំពុងជំរុញឱ្យមន្ត្រីពាក់ព័ន្ធនៃក្រសួងពាណិជ្ជកម្ម ធ្វើកិច្ចសហការជាមួយគណៈកម្មាធិការជាតិជំរុញចលនាភូមិ១ ផលិតផល១ ឱ្យកាន់តែ​ជិតស្និទ្ធ និងសកម្មថែមទៀត ដើម្បីលើកកម្ពស់ការប្រើប្រាស់ផលិតផលខ្មែរ។

ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម និងជាអនុប្រធានទី១ នៃគណៈកម្មាធិការជាតិ​ជំរុញ​ចលនាភូមិ១ ផលិតផល១ លើកឡើងបែបនេះ កាលពីថ្ងៃម្សិលមិញក្នុងកិច្ចប្រជុំពិភាក្សា​ពី​ការអភិវឌ្ឍអាជីវកម្មប្រកប​ដោយ​សុចរិតភាព​ និងការទទួលបានទីផ្សារសម្រាប់អ្នកផលិតក្នុងស្រុក ក្រោម​អធិបតីភាពឯកឧត្តម យឹម ឆៃលី ឧបនាយករដ្ឋមន្រ្តី ប្រធានក្រុមប្រឹក្សាស្តារអភិវឌ្ឍន៍​វិស័យ​កសិកម្ម​និងជនបទ និងជាប្រធាននៅទីស្តីការគណៈរដ្ឋមន្រ្តី។

កិច្ចប្រជុំនេះ ​មានការអញ្ជើញចូលរួមពីក្រសួង-ស្ថាប័នពាក់ព័ន្ធ​ តំណាងខេត្តទាំង១១​នៃ​គោលដៅ​គម្រោង​អភិវឌ្ឍន៍​អាជីវកម្មប្រកបដោយ​សុចរិតភាព និង​ការ​ទទួល​បានទីផ្សារ​សម្រាប់អ្នក​ផលិត​ក្នុងស្រុក​សហគ្រាសមីក្រូ និងសហគ្រាសធុនតូច និងមធ្យម (SME) អង្គការជាតិ ​អន្តរជាតិ ព្រមទាំង​វិស័យឯកជនផងដែរ។

ឯកឧត្តម ប៉ាន សូរស័ក្តិ ជឿជាក់ថា ​ក្រសួងនឹងបង្កើតបាននូវវប្បធម៌សាមគ្គីភាពមួយ​ដើម្បីជំរុញ និង​គាំទ្រ​ដល់កសិករ ផលិតករ សិប្បករ ​និងសេវាករខ្មែរ ​ក្នុងគោល​ដៅកែលម្អជីវភាពរស់នៅ និង​គុណភាពជីវិតរបស់ប្រជាពលរដ្ឋ។

នៅក្នុងកិច្ចប្រជុំនេះ ឯកឧត្តមឧបនាយករដ្ឋមន្ត្រី យឹម ឆៃលី បានគូសបញ្ជាក់ថា គណៈកម្មាធិការ​ជាតិ​ជំរុញ​ចលនា១ ​ផលិតផល១ គឺជា​ស្ថាប័នរដ្ឋមួយ​ដែលមាន​បេសកកម្ម​សម្របសម្រួល និង​សហការជាមួយក្រសួងស្ថាប័នពាក់ព័ន្ធ ​ដើម្បីជួយលើកកម្ពស់ផលិតផលខ្មែរ លើកកម្ពស់​សេដ្ឋកិច្ច​គ្រួសារ និង​សហគមន៍ ដែលបាននិងកំពុងផលិតនូវផលិតផលនានា នៅតាមសហគមន៍ និង​សហគ្រាសធុនតូច និងមធ្យម។ល៕ អត្ថបទ៖ ឈិត បូរ៉ាវី