អ្នកនាំពាក្យក្រសួងការបរទេសចិនលោក Guo Jiakun និយាយនៅថ្ងៃចន្ទនេះថា ចិនមានការព្រួយបារម្ភយ៉ាងខ្លាំងចំពោះការរញ្ជួយដីនៅវេណេស៊ុយអេឡា ហើយនិងបានសម្រេចចិត្តបញ្ជូនគ្រឿងផ្គត់ផ្គង់សង្រ្គោះបន្ទាន់ ១៤,៧២លានដុល្លារដល់ប្រទេសមួយនេះ ។

លោក Jiakun និយាយប្រាប់សន្និសីទសារព័ត៌មានថា គ្រឿងផ្គត់ផ្គង់នេះ នឹងត្រូវចែកចាយក្នុងពេលដ៏ខ្លីខាងមុខនេះ ហើយទីក្រុងប៉េកាំង មានបំណងផ្តល់ជំនួយបន្ថែមទៀតផងដែរ ។

គួរឲ្យដឹងថា ចំនួនមនុស្សស្លាប់សរុប ក្នុងគ្រោះរញ្ជួយដី ២លើកនៅវេណេស៊ុយអេឡា បានកើនឡើងដល់ជិត ១.៥០០នាក់ និងមនុស្សជាង ៥០.០០០ នាក់ផ្សេងទៀត ត្រូវបានរាយការណ៍ថាបាត់ខ្លួន

ស្របពេលដែលក្រុមជួយសង្រ្គោះបរទេស ធ្វើដំណើរទៅកាន់រដ្ឋ La Guaira ដែលជារដ្ឋរងផលប៉ះពាល់ខ្លាំងជាងគេនៅក្នុងប្រទេសដែលញាំញីដោយសារវិបត្តិនយោបាយ និងសេដ្ឋកិច្ចមួយនេះ ។

ប្រធានាធិបតីស្តីទីវេណេស៊ុយអេឡា លោកស្រី Delcy Rodríguez បាននិយាយថា មនុស្ស ៣៣ នាក់ត្រូវបានទាញចេញពីគំនរបាក់បែកទាំងរស់រានមានជីវិតកាលពីចុងសប្តាហ៍នេះ។

លោកស្រីបន្តថា ក្នុងចំណោមពួកគេមានក្មេងប្រុសអាយុ ១១ ឆ្នាំ ២នាក់ ដែលត្រូវបានជួយសង្គ្រោះដាច់ដោយឡែកពីគ្នា ចេញពីអគារបាក់រលំ កាលពីថ្ងៃអាទិត្យ ៕