លោកស្រី Keiko Fujimori ដែលជាអ្នកនយោបាយ​អភិរក្សនិយម បានឈ្នះការបោះឆ្នោតប្រធានាធិបតីប៉េរូដោយសំឡេងស្ដួចស្ដើង​ ដោយ​នេះ​ជា​ការ​ឈរឈ្មោះ​លើកទី៤ របស់លោកស្រី សម្រាប់តំណែងខ្ពស់បំផុតនៅក្នុងប្រទេសដែលសម្បូរទៅដោយធនធាន​ទង់ដែងនេះ​។

បន្ទាប់ពីធ្វើ​ការពិនិត្យឡើងវិញយ៉ាងយូរ លើ​សន្លឹកឆ្នោតរាប់ពាន់សន្លឹកដែល​មាន​ភាព​ចម្រូងចម្រាស ពីការបោះឆ្នោតជុំទី២ នា​ថ្ងៃទី៧ ខែមិថុនា ការរាប់សន្លឹកឆ្នោតពេញលេញដោយទីភ្នាក់ងារបោះឆ្នោត ONPE កាល​ពី​ថ្ងៃចន្ទ (ទី២៩ ខែមិថុនា ឆ្នាំ២០២៦) បាន​បង្ហាញ​ថា លោកស្រី Fujimori ទទួលបានសំឡេងឆ្នោត ៥០.១៤ភាគរយ។ លោកស្រី Fujimori វ័យ ៥១ឆ្នាំ បានបញ្ចប់ដោយ​មាន​សន្លឹក​ឆ្នោតនាំមុខ​ត្រឹមតែ ៤៩.៦៤១សំឡេងប៉ុណ្ណោះ លើ​គូប្រជែងឆ្វេងនិយម លោក Roberto Sánchez ដែលតាម​ពី​ក្រោយ​ដោយសំឡេង ៤៩,៨៧ភាគរយ។

អំឡុងពេល​ថ្លែងទៅកាន់អ្នកសារព័ត៌មាននៅខាងក្រៅគេហដ្ឋាន​របស់លោកស្រី កាលពី​រសៀលថ្ងៃទី២៩ ខែមិថុនា លោកស្រី Fujimori បាននិយាយថា លោកស្រី​ពេញចិត្តនឹងលទ្ធផលនៃការរាប់សន្លឹកឆ្នោតរបស់ ONPE ប៉ុន្តែកំពុងរង់ចាំការប្រកាសជាផ្លូវការពីគណៈកម្មាធិការជាតិរៀប​ចំ​បោះឆ្នោតរបស់ប្រទេសប៉េរូ។

លទ្ធផលនេះធ្វើឱ្យលោកស្រី Fujimori ក្លាយជាប្រធានាធិបតីស្ត្រីដំបូងគេដែលត្រូវបានបោះឆ្នោត​ជ្រើសរើសនៅក្នុងប្រទេសប៉េរូ៕