ជនជាតិអាមេរិកជិត ១៦២លាននាក់ មកពី ៣៥រដ្ឋ កំពុងស្ថិតក្រោមការជូនដំណឹង អំពីអាកាសធាតុ​​ក្ដៅ​ខ្លាំង ខណៈដែលចំហេះ​ព្រៃដ៏អាក្រក់ នៅតែបន្តឆប​ឆេះ នៅភាគខាងលិចរបស់​សហរដ្ឋអាមេរិក ដោយកម្ដៅ​ត្រូវបានគេរំពឹងថា នឹងក្ដៅ​កាន់តែខ្លាំងឡើង អំឡុងសប្តាហ៍នេះ។

ទីក្រុងនានា ក្នុងតំបន់ហានិភ័យ រួមមានទីក្រុង Boston, New York, Philadelphia, Baltimore, Washington, Chicago, Minneapolis, St. Louis, Nashville, Atlanta, Orlando និង Cleveland។ នេះបើយោងតាមប្រព័ន្ធផ្សព្វផ្សាយ​ ​​NBC News ដោយដកស្រង់សម្តីរបស់ទីភ្នាក់ងារ​អាកាសធាតុជាតិ។

កម្ដៅ​ទំនងជានៅតែបន្តគ្រប​ដណ្ដប់​លើ​ទូទាំងភាគកណ្តាលសហរដ្ឋអាមេរិក នៅសប្តាហ៍នេះ ដោយរាលដាល​ទៅ​ដល់ភាគឦសាន ចាប់ពីថ្ងៃពុធ (ទី១ ខែកក្កដា ឆ្នាំ២០២៦) និងមានរយៈពេលរហូតដល់ថ្ងៃឈប់សម្រាក នៅ​ចុងសប្តាហ៍​។

ហានិភ័យ​ក្ដៅ​ខ្លាំង នៅតែបន្ត ដោយកម្ដៅ​ពេល​យប់​រឹតតែ​ក្ដៅ​ និងធ្វើ​ឲ្យ​​សុខភាពកាន់​តែ​គ្រោះ​ថ្នាក់​។ អាកាស​ធាតុ​ក្ដៅ​ខ្លាំង​បំផុត​ ត្រូវបានគេរំពឹងមាន​នៅថ្ងៃព្រហស្បតិ៍ ដល់ថ្ងៃសៅរ៍ នៅទូទាំងតំបន់ Midwest, Great Lakes, mid-Atlantic និង​ Northeast ដោយមាន​កំណត់ត្រាប្រចាំថ្ងៃជិត ១០០ហ្វារិនហៃ (ជិត ៣៨អង្សាសេ)​ ដែលអាចស្មើគ្នា ឬបំបែកកំណត់ត្រា នៅថ្ងៃទី៤ ខែកក្កដា។

ទីក្រុង New York អាចឡើងដល់ ៩៥ហា្វរិនហៃ​ (៣៥អង្សាសេ) នៅថ្ងៃសុក្រ ដោយមាន​សន្ទស្សន៍កម្ដៅ​ ១០៦ហ្វារិនហៃ​ (៤១អង្សាសេ)។ ទីក្រុងវ៉ាស៊ីនតោន និង Raleigh រដ្ឋ North Carolina អាចឡើងដល់ ១០៣ហ្វារិនហៃ (៣៩អង្សាសេ) ដោយ​មាន​សន្ទស្សន៍កម្ដៅប្រហែល ១០៨ហ្វារិនហៃ (៤២អង្សាសេ) និង ១០៧ហ្វារិនហៃ (៤២អង្សាសេ)។

ទន្ទឹមនឹងនេះ ចំហេះ​ព្រៃបានរាលដាលពាសពេញផ្នែកខាងក្នុងនៃភាគខាងលិចសហរដ្ឋអាមេរិក កាល​ពី​ចុងសប្តាហ៍ ជាពិសេសនៅរដ្ឋ Utah និង​ Colorado ។ មនុស្សប្រហែល ២លាននាក់ ស្ថិតក្រោមការព្រមានអំពីអគ្គិភ័យ កាល​ពី​ថ្ងៃចន្ទ នៅទូទាំងរដ្ឋ Arizona, Colorado, New Mexico, Utah និងផ្នែកខ្លះនៃរដ្ឋ Wyoming, South Dakota​ និង Nebraska៕