ទីក្រុងសេអ៊ូល បាន​ឱ្យដឹង​ថា ប្រទេស​កូរ៉េខាងត្បូង និងអ៊ុយក្រែន បានធ្វើកិច្ចពិភាក្សា «ប្រកប​ដោយ​ការ​ស្ថាបនា» នៅថ្ងៃអង្គារ (ទី៣០ ខែមិថុនា ឆ្នាំ២០២៦) នេះ អំពីជោគវាសនារបស់ទាហានកូរ៉េខាងជើង ២រូបដែលត្រូវបានចាប់ខ្លួន ខណៈពេលដែល​កំពុងចូល​រួម​ប្រយុទ្ធជាមួយ​ប្រតិបត្តិការ​របស់​រុស្ស៊ី។

រដ្ឋមន្ត្រីការបរទេសកូរ៉េខាងត្បូង លោក Cho Hyun និងសមភាគីអ៊ុយក្រែន លោក Andrii Sybiha បានពិភាក្សាអំពីបញ្ហានេះ ក្នុងអំឡុងពេលមាន​ជំនួប នៅទីក្រុងសេអ៊ូល។

ទាហានទាំង​ ២រូប​នោះ​ ត្រូវបានចាប់ខ្លួនដោយកងកម្លាំងអ៊ុយក្រែន កាលពីខែមករាឆ្នាំមុន ខណៈពេលកំពុងប្រយុទ្ធជួយ​រុស្ស៊ី នៅក្នុងតំបន់ Kursk។ កូរ៉េខាងជើង និងរុស្ស៊ី បានទាមទារឱ្យមានការបញ្ជូនទាហានទាំង ២នាក់ត្រឡប់ទៅវិញ ប៉ុន្តែក្រុមសិទ្ធិមនុស្ស និងអ្នកជំនាញ បានព្រមានថា ពួកគេអាចប្រឈមនឹងការដាក់ទណ្ឌកម្មយ៉ាងធ្ងន់ធ្ងរ ប្រសិនបើពួកគេត្រឡប់ទៅទីក្រុងព្យុងយ៉ាងវិញ។

ទាហានទាំង ២នាក់​ បានសុំឱ្យបញ្ជូនទៅកូរ៉េខាងត្បូង។ ទីក្រុងសេអ៊ូលកំពុងស្វែងរកការបញ្ជូន​ពួកគេ ដោយផ្អែកលើមូលដ្ឋានថា ពួកគេជាពលរដ្ឋនៃសាធារណរដ្ឋកូរ៉េតែមួយ ដែលបានពណ៌នានៅក្នុងរដ្ឋធម្មនុញ្ញរបស់ខ្លួន។

អ្នកនាំពាក្យក្រសួងការបរទេសកូរ៉េខាងត្បូង បានប្រាប់អ្នកសារព័ត៌មានថា រដ្ឋមន្ត្រីទាំង២ «បានចូលរួមក្នុងការពិភាក្សាប្រកបដោយការ​ស្ថាបនា» អំពី​អនាគតរបស់ទាហាន​ទាំង​ ២រូប នៅថ្ងៃអង្គារនេះ​។ ពួកលោក​បានយល់ស្រប​ធ្វើ​ការ​ងារ​ដោយ​គោរព​តាម​ «ច្បាប់អន្តរជាតិ និងគោលការណ៍មនុស្សធម៌»។

អ្នកនាំពាក្យរូបនេះបានបន្ថែម​ថា «រដ្ឋាភិបាលនឹងបន្តកិច្ច​ប្រឹងប្រែងផ្នែកការទូត ដើម្បីជំរុញ និងដោះស្រាយបញ្ហាអ្នកទោសសង្គ្រាម ឬឈ្លើយ​សឹកជនជាតិ​កូរ៉េខាងជើង»៕