អ៊ីរ៉ង់ បាននិយាយកាលពីថ្ងៃអង្គារ ៣០មិថុនាសប្ដាហ៍នេះថាខ្លួននឹងមិនជួបជាមួយបេសកជនជាន់ខ្ពស់អាមេរិកដែលបានហោះហើរទៅកាន់តំបន់នេះបន្ទាប់ពីការផ្ទុះឡើងនៃអរិភាព ទេ ដែលធ្វើឲ្យប៉ះពាល់ដល់ការរំពឹងទុកសម្រាប់សន្តិភាពយូរអង្វែងរវាងប្រទេសទាំងពីរ។

ក្រុមមន្ត្រីអ៊ីរ៉ង់ក៏បាននិយាយផងដែរថាភាគីទាំងពីរនៅតែត្រូវដោះស្រាយលក្ខខណ្ឌនៃបទឈប់បាញ់ដែលពួកគេបានចុះហត្ថលេខាកាលពីពីរសប្តាហ៍មុន មុនពេលពួកគេអាចដោះស្រាយបញ្ហាលំបាកៗជាងនេះ ដូចជាដែនកំណត់ដែលអាចកើតមានចំពោះកម្មវិធីនុយក្លេអ៊ែររបស់ខ្លួនជាដើម។

ការវិវត្តន៍នានាបានបង្ហាញថាភាគីទាំងពីរនៅឆ្ងាយពីគ្នាលើសសរស្តម្ភសំខាន់ៗនៃក្របខ័ណ្ឌគោលដំបូង ដែលអំពាវនាវឱ្យអ៊ីរ៉ង់ដកការរឹតត្បិតរបស់ខ្លួននៅលើច្រកសមុទ្រ Hormuz ជាថ្នូរនឹងការលើកទឹកចិត្តផ្នែកហិរញ្ញវត្ថុ និងរៀបចំការចរចារយៈពេល៦០ ថ្ងៃដើម្បីឈានទៅរកកិច្ចព្រមព្រៀងសន្តិភាពអចិន្ត្រៃយ៍។

លោក Jared Kushner កូនប្រសាររបស់ប្រធានាធិបតីអាមេរិក Donald Trump និងលោក Steve Witkoff បេសកជន បានទៅដល់ទីក្រុង Doha រួចហើយសម្រាប់អ្វីដែលសេតវិមានពិពណ៌នាថាជាកិច្ចចរចា "កម្រិតខ្ពស់" ប៉ុន្តែអ៊ីរ៉ង់ និងប្រទេសកាតាជាម្ចាស់ផ្ទះបាននិយាយថាពួកគេនឹងជួបជាមួយក្រុមអ្នកសម្របសម្រួល ជាជាងជនជាតិអ៊ីរ៉ង់ខ្លួនឯង។

ប្រទេសកាតាបាននិយាយថា លោកនាយករដ្ឋមន្ត្រី Sheikh Mohammed bin Abdulrahman al-Thani គឺស្ថិតក្នុងចំណោមអ្នកដែលនឹងជួបជាមួយលោក Witkoff និងលោក Kushner។អ្នកនាំពាក្យក្រសួងការបរទេសអ៊ីរ៉ង់លោក Esmaeil Baghaei បាននិយាយថា មិនមានកិច្ចប្រជុំកម្រិតណាមួយជាមួយភាគីអាមេរិក ត្រូវបានគ្រោងទុកសម្រាប់ថ្ងៃខាងមុខទេ។យោងតាមលោក Majed al-Ansari អ្នកនាំពាក្យក្រសួងការបរទេសកាតា ប្រទេសទាំងពីរត្រូវបាន គ្រោងនឹងចាប់ផ្តើមកិច្ចពិភាក្សាបច្ចេកទេសកម្រិតទាប៕