ប្រព័ន្ធផ្សព្វផ្សាយរដ្ឋបានរាយការណ៍ថា ពិធីបុណ្យសពរបស់អតីតមេដឹកនាំកំពូលអ៊ីរ៉ង់ លោក Ali Khamenei នឹងចាប់ផ្តើមនៅទីក្រុងតេអេរ៉ង់នៅថ្ងៃទី៤ ខែកក្កដា ហើយបញ្ចប់ដោយការបញ្ចុះសពរបស់លោកនៅទីក្រុង Mashhad ភាគឦសាន នៅថ្ងៃទី៩ ខែកក្កដា។ លោក Khamenei ត្រូវបានសម្លាប់នៅក្នុងការវាយប្រហាររបស់អ៊ីស្រាអែល និងសហរដ្ឋអាមេរិកលើប្រទេសអ៊ីរ៉ង់ កាលពីខែកុម្ភៈ។

សហរដ្ឋអាមេរិក និងអ៊ីស្រាអែល បាននិយាយថា ការវាយប្រហារតាមអាកាសបានសម្លាប់លោក Khamenei ក្នុងយុទ្ធនាការយោធាដើម្បីផ្តួលរំលំរដ្ឋាភិបាលសាធារណរដ្ឋអ៊ីស្លាម។ បន្ទាប់ពីមរណភាពបស់លោក អ៊ីរ៉ង់បានតែងតាំង លោក Mojtaba Khamenei ឱ្យឡើងកាន់តំណែងជំនួសឪពុករបស់លោកជាមេដឹកនាំកំពូលរបស់ប្រទេស។ រូបភាពធំៗរបស់ លោក Ayatollah Ali Khamenei ត្រូវបានដាក់បង្ហាញក្នុងទីក្រុងតេអេរ៉ង់កាលពីថ្ងៃអង្គារ ទី៣០ ខែមិថុនា ខណៈក្រុមការងារបានប្រញាប់ប្រញាល់រៀបចំសម្រាប់ពិធីបុណ្យសពរបស់លោក។

ពិធីបុណ្យសពដែលដំបូងឡើយត្រូវបានពន្យារពេលខណៈសង្គ្រាមនៅតំបន់មជ្ឈិមបូព៌ាកាន់តែខ្លាំងឡើងនឹងប្រព្រឹត្តទៅខណៈអ៊ីរ៉ង់និងសហរដ្ឋអាមេរិក គាំទ្របទឈប់បាញ់ដ៏ផុយស្រួយបន្ទាប់ពីបានចុះហត្ថលេខាលើកិច្ចព្រមព្រៀងបឋមដើម្បីបញ្ឈប់ជម្លោះ។ លោក Khamenei ត្រូវបានសម្លាប់ក្នុងអាយុ ៨៦ ឆ្នាំ នៅរដ្ឋធានី ប្រទេសអ៊ីរ៉ង់ នៅថ្ងៃទី២៨ ខែកុម្ភៈ ជាថ្ងៃដំបូងនៃសង្គ្រាម។ ពិធីបុណ្យសពជាសាធារណៈរបស់លោកនឹងចាប់ផ្តើមនៅថ្ងៃសៅរ៍ ដោយសពរបស់លោកត្រូវបានដាក់តម្កល់ឲ្យចូលគោរពនៅក្នុងអគារដ៏ធំមួយនៅទីក្រុងតេអេរ៉ង់ភាគកណ្តាល។ យោងតាមមន្ត្រីបានឲ្យដឹងថា ពិធីនេះត្រូវបានគេរំពឹងថានឹងមានអ្នកចូលរួមកាន់ទុក្ខចន្លោះពី ១៥ ទៅ២០ លាននាក់ ដែលនឹងក្លាយជាពិធីបុណ្យសពរដ្ឋធំបំផុតនៅក្នុងប្រវត្តិសាស្ត្ររបស់ប្រទេស។