ប្រទេសប៉ូឡូញ បានបង្ហាញពីបំណងរបស់ខ្លួនក្នុងការផ្អាកការផ្តល់យន្តហោះចម្បាំងបន្ថែមដល់ប្រទេសជិតខាងខ្លួន គឺអ៊ុយក្រែន ក្នុងពេលទំនាក់ទំនងទ្វេភាគីកាន់តែធ្លាក់ចុះអួរអាប់។

រដ្ឋមន្ត្រីក្រសួងការពារជាតិប៉ូឡូញ លោក Wladyslaw Kosiniak-Kamysz បានបញ្ជាក់នៅក្នុងបទសម្ភាសន៍តាមទូរទស្សន៍ថា អ៊ុយក្រែននឹងមិនទទួលបានយន្តហោះចម្បាំង MiG-29 សម័យសូវៀតបន្ថែមទៀតទេ។

លោកបាននិយាយថា អ៊ុយក្រែន ពុំបានគោរពតាមកិច្ចព្រមព្រៀងក្នុងការចែករំលែកបច្ចេកវិទ្យាយានដ្រូនរបស់ខ្លួនជាមួយប្រទេសប៉ូឡូញជាថ្នូរនឹងយន្តហោះ។

ចាប់តាំងពីការចាប់ផ្តើមការឈ្លានពានរបស់រុស្ស៊ី ប្រទេសប៉ូឡូញបានគាំទ្រអ៊ុយក្រែនដោយផ្តល់ជំនួយយោធា និងទទួលយកជនភៀសខ្លួន។ ប្រទេសប៉ូឡូញ ត្រូវបានកាន់កាប់ដោយសហភាពសូវៀតក្នុងអំឡុងសង្គ្រាមលោកលើកទីពីរ។

ប៉ុន្តែកាលពីខែមុន ប្រទេសប៉ូឡូញបានប្រកាសថា ខ្លួននឹងដកហូតគ្រឿងឥស្សរិយយសខ្ពស់បំផុតរបស់ប្រទេសពីប្រធានាធិបតីអ៊ុយក្រែន លោក Volodymyr Zelenskyy។

ប្រទេសនេះបាននិយាយថា អ៊ុយក្រែនបានដាក់ឈ្មោះអង្គភាពយោធាមួយតាមក្រុមបះបោអ៊ុយក្រែនក្នុងសម័យសង្គ្រាមលោកលើកទីពីរ។ ក្រុមនេះត្រូវបានគេចោទប្រកាន់ថាមានជាប់ពាក់ព័ន្ធទៅនឹងការសម្លាប់រង្គាលប្រជាជនប៉ូឡូញក្នុងអំឡុងសង្គ្រាម។