អ្នកជំនាញសុខភាពបានព្រមានថា ប្រទេសបង់ក្លាដែសអាចប្រឈមមុខនឹងការកើនឡើងយ៉ាងខ្លាំងនៃការឆ្លងជំងឺគ្រុនឈាមក្នុងរយៈពេលពីរខែខាងមុខ ខណៈដែលអាកាសធាតុសើម និងការគ្រប់គ្រងមូសមិនគ្រប់គ្រាន់ ជំរុញឲ្យមានការផ្ទុះឡើងនៃជំងឺនេះកាន់តែទូលំទូលាយ។

ការរីករាលដាលនៃជំងឺនេះ បានកើនឡើងយ៉ាងឆាប់រហ័ស ក្នុងរយៈពេលប៉ុន្មានសប្តាហ៍ថ្មីៗនេះ ដែលបង្កើនការព្រួយបារម្ភ បន្ទាប់ពីការផ្ទុះឡើងដ៏សាហាវបំផុតនៅក្នុងប្រទេសនេះ ក្នុងឆ្នាំ ២០២៣។

ការស្លាប់ដោយសារជំងឺគ្រុនឈាម បានកើនឡើងពីម្នាក់ នៅចុងខែឧសភា ដល់ ១៨ នាក់ នៅចុងខែមិថុនា ខណៈដែលការឆ្លងដែលបានរាយការណ៍បានកើនឡើងជាង ៨ដង ពី ៧១៤ ដល់ ៥.៩២៤នាក់។ នេះបើយោងតាមទិន្នន័យរបស់ក្រសួងសុខាភិបាល។

លោកសាស្ត្រាចារ្យ Kabirul Bashar អ្នកជំនាញខាងសត្វល្អិតនៅសាកលវិទ្យាល័យ Jahangirnagar បាននិយាយថា៖«យើងរំពឹងថា ករណីជំងឺគ្រុនឈាមនៅទីក្រុងដាក្កា នឹងកើនឡើងយ៉ាងហោចណាស់ទ្វេដង នៅក្នុងខែកក្កដាពីកម្រិតខែមិថុនា និងកើនឡើងបីទៅបួនដង នៅខែសីហា»៕