សារព័ត៌មាន​មួយ​របស់​ប្រទេស​អ៊ីស្រាអែល បានរាយការណ៍កាលពីថ្ងៃអង្គារ (ទី៣០ ខែមិថុនា ឆ្នាំ២០២៦) ថា ក្រុមប្រឹក្សាសន្តិភាព (Board of Peace) នឹងចាប់ផ្តើមគម្រោងសាកល្បង ក្នុងរយៈពេលប៉ុន្មានសប្តាហ៍ ដើម្បីគ្រប់គ្រងមជ្ឈមណ្ឌលជម្រកមនុស្សធម៌ នៅក្នុងតំបន់នៃ​​ដែន​ដី​ហ្កាហ្សាស្ទ្រីបដែលមិនស្ថិតនៅក្រោមការគ្រប់គ្រងរបស់ក្រុម​ហាម៉ាស។

តំបន់ Tel al-Sultan នៅ​ជិតទីក្រុង​ Rafah នឹងក្លាយជាគោលដៅដំបូងដែលជនស៊ីវិល នឹងត្រូវបានណែនាំ «ជាពិសេសអ្នកដែលមិនមានទំនាក់ទំនងជាមួយក្រុម​ហាម៉ាស»។ នេះបើយោងតាមរបាយការណ៍របស់សារព័ត៌មាន​ Israel Hayom។

សារព័ត៌មាន​នេះ ដោយដកស្រង់ប្រភពមិនបញ្ចេញឈ្មោះ បានឲ្យ​ដឹង​ថា កម្លាំងពហុជាតិសាសន៍ដែលគេស្គាល់ថា ជាកម្លាំងរក្សាស្ថិរ​ភាពអន្តរជាតិដឹកនាំដោយក្រុមប្រឹក្សានេះ​ នឹងត្រូវបានដាក់ពង្រាយនៅ​តំបន់នោះ។ សារព័ត៌មាន​នេះ​បានបន្ថែមថា កម្លាំងនេះនឹងឈរជើងនៅជំរំ Amitai របស់អ៊ីស្រាអែល នៅជិតតំបន់ហ្កាហ្សា។

របាយការណ៍នេះបានឱ្យ​ដឹង​ទៀត​ថា កម្លាំងនេះត្រូវបានគេរំពឹងថា នឹងបំពាក់ដោយអាវុធ មិនប្រល័យជីវិត ដើម្បីរក្សាសណ្តាប់ធ្នាប់ នៅក្នុងតំបន់មនុស្សធម៌ ខណៈដែលយោធាអ៊ីស្រាអែល នឹងបន្តពង្រីក និងពង្រឹងការគ្រប់គ្រងរបស់ខ្លួនលើតំបន់ដែលហួសពីអ្វីដែលហៅថា «ខ្សែព្រំ​ដែន​ពណ៌​លឿង»។ ហើយ​បើយោងតាមសារព័ត៌មាន​ដដែល​នេះ​ បាន​បន្ថែម​ថា មន្ត្រីក្រុមប្រឹក្សាសន្តិភាព បានសន្យាថា បេតុងនឹងមិនត្រូវបានប្រើសម្រាប់ការកសាងឡើងវិញ នៅក្នុងតំបន់ទាំងនោះទេ។

ផ្ទុយទៅវិញ លំនៅឋាន​ចល័ត ឬរថយន្តច្នៃធ្វើ​ជា​ផ្ទះ​ នឹងត្រូវបានដំឡើង រួមជាមួយនឹងសេវាកម្មវេជ្ជសាស្រ្ត និងសេវាកម្មសំខាន់ៗផ្សេងទៀត សម្រាប់អ្នកស្រុក។ របាយការណ៍នេះបានអះអាងថា ផែនការនេះនឹងអនុញ្ញាតឱ្យយោធាអ៊ីស្រាអែលបន្តពង្រីកការគ្រប់គ្រងរបស់ខ្លួន លើដែន​ដីហ្កាហ្សា៕