ប្រធានាធិបតីអ៊ុយក្រែន លោក Volodymyr Zelenskyy បាននិយាយនៅ​ថ្ងៃពុធ (ទី១ ខែកក្កដា ឆ្នាំ២០២៦) នេះ​ថា ទីក្រុងគីវបានវាយប្រហាររោងចក្រចម្រាញ់ប្រេងមួយ ក្នុងតំបន់ Bashkortostan របស់រុស្ស៊ី និងរោងចក្រឧស្សាហកម្មការពារជាតិមួយ នៅតំបន់ Penza។

តាម​រយៈ​សេចក្តីថ្លែងការណ៍មួយនៅលើកម្មវិធីផ្ញើសារ​ Telegram លោក Zelenskyy បានបញ្ជាក់​ថា រោងចក្រចម្រាញ់ប្រេង Ufa ជាក្រុមហ៊ុនផលិតប្រេងរំអិលធំជាងគេមួយរបស់រុស្ស៊ី ដែលមានទីតាំងចម្ងាយជាង ១,៣០០គីឡូម៉ែត្រ ពីសមរភូមិ​ជួរមុខ ត្រូវបានវាយប្រហារ អំឡុង​ការវាយប្រហារពេញមួយយប់។

លោកក៏បានឱ្យ​​ដឹង​ផងដែរថា អ៊ុយក្រែនបានវាយប្រហាររោងចក្រឧស្សាហកម្មយោធាមួយដែលពាក់ព័ន្ធនឹងការផលិតគ្រឿងបន្លាស់មីស៊ីល នៅក្នុងតំបន់ Penza របស់រុស្ស៊ី។

ដោយឡែក ប្រព័ន្ធផ្សព្វផ្សាយអ៊ុយក្រែន ដោយដកស្រង់ប្រភពនៅក្នុងទីភ្នាក់ងារ​សន្តិសុខអ៊ុយក្រែន បានរាយការណ៍ថា ទីភ្នាក់ងារនេះបានវាយប្រហារមូលដ្ឋានទ័ពអាកាស Saky នៅតំបន់​គ្រីមៀ ដែលជាអាកាសយានដ្ឋានយោធាសំខាន់មួយរបស់រុស្ស៊ី នៅឧបទ្វីបនេះ​។

អភិបាលតំបន់ Penza របស់រុស្ស៊ី បានឱ្យដឹង​នៅលើវេទិកាបណ្ដាញ​សង្គមរុស្ស៊ី Max ថា ប្រព័ន្ធ​ការពារដែនអាកាសរបស់រុស្ស៊ី បានបាញ់ទម្លាក់យាន​ដ្រូន​ ១គ្រឿងដែល​ហោះ​លើតំបន់នេះ​។

មិនទាន់​មានការអត្ថាធិប្បាយភ្លាមៗ​ពីរុស្ស៊ីនៅ​ឡើយទេ ជុំវិញ​ការអះអាងរបស់អ៊ុយក្រែន ទាក់ទងនឹងរោងចក្រចម្រាញ់ប្រេង Ufa ឬមូលដ្ឋានទ័ពអាកាស Saky នៅតំបន់គ្រីមៀ​៕