មនុស្សជាច្រើននាក់ បានបាត់បង់ជីវិត ហើយ​មួយ​ចំនួន​ទៀតបាន​រងរបួសធ្ងន់ធ្ងរ ដោយសារអគ្គិ​ភ័យដ៏ធំមួយបានឆាបឆេះនៅក្នុងអគារផ្ទះល្វែង​កម្ពស់ ១០ជាន់ នៅទីក្រុង Antwerp របស់​ប្រទេសបែលហ្ស៊ិក នា​ថ្ងៃពុធ (ទី១ ខែកក្កដា ឆ្នាំ២០២៦) នេះ។ នេះបើយោងតាមសេចក្ដី​រាយការណ៍​របស់ប្រព័ន្ធផ្សព្វផ្សាយជាតិជាភាសាហូឡង់ VRT។

អគ្គិ​ភ័យនេះ បានកើត​មាន​ឡើង​បន្តិច​មុនម៉ោង ១០​ព្រឹក ម៉ោង​ក្នុង​ស្រុក (ត្រូវ​នឹង​ម៉ោង ៨:០០ ម៉ោងសកល) នៅក្នុងអគារលំនៅឋាន​មួយកន្លែង នៅ​តំបន់​ Linkeroever របស់​ទីក្រុងនេះ​។ នគរបាល​បានបញ្ជាក់ថា មានអ្នកស្លាប់ជា​ច្រើននាក់ ទោះបីជាចំនួនពិតប្រាកដនៃជនរងគ្រោះ មិនទាន់ត្រូវបានអះ​អាង​នៅឡើយក៏ដោយ​ ខណៈដែលក្រុមជួយសង្គ្រោះនៅតែបន្តស្វែងរកនៅក្នុងអគារនោះ។

មាន​មនុស្សជាង ២០០នាក់រស់នៅក្នុងអគារផ្ទះល្វែង​នេះ​ ហើយប្រតិបត្តិការជម្លៀស នៅតែដំណើរការជាច្រើនម៉ោង បន្ទាប់ពីអគ្គិភ័យបានចាប់ផ្តើមឆាប​ឆេះ​ឡើង​។ ក្រុមយានដ្រូន​របស់នាយកដ្ឋានពន្លត់អគ្គិភ័យ Antwerp ត្រូវបានដាក់ពង្រាយ ដើម្បីជួយដល់កិច្ចប្រឹងប្រែងស្វែងរក និងជួយសង្គ្រោះ។

អាជ្ញាធរបានចេញសេចក្តីជូនដំណឹងដោយជំរុញឱ្យអ្នកស្រុកនៅក្នុងតំបន់នោះ បិទទ្វារ និងបង្អួចរបស់ពួកគេ ហើយ​ជៀសវាងកុំ​ទៅ​ជិតកន្លែងដែលមានអគ្គិ​ភ័យនេះ​។ មូលហេតុពិត​ប្រាកដដែលនាំ​ឱ្យមាន​អគ្គិភ័យនេះ​មិនទាន់ត្រូវបានកំណត់នៅឡើយទេ៕