ព្រៃវែង៖ សមិទ្ធផលនានា នៅក្នុងមន្ទីរពេទ្យបង្អែកស្រុកពារាំង ខេត្តព្រៃវែង រួមមាន៖ អគារផ្ទះបាយ និងសមិទ្ធផលមួយចំនួនទៀត ជាអំណោយសមាគមន៍និកាយសាសនាចក្រ នៃព្រះយេស៊ូគ្រីស្ទ ត្រូវបានសម្ពោធដាក់ឲ្យប្រើប្រាស់ជាផ្លូវការ នៅថ្ងៃទី២៩ ខែមេសា ឆ្នាំ២០២២ ក្រោមវត្តមានលោកស្រី វី សាឌី ទីប្រឹក្សាក្រសួងមហាផ្ទៃ និងជាអនុប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ។

 លោកស្រី វី សាឌី បានលើកឡើងថា សមិទ្ធផលនានា ដែលបានសម្ពោធដាក់ឲ្យប្រើប្រាស់ជាផ្លូវការនាពេលនេះ កើតចេញពីភាពសាមគ្គីរវាងប្រជាពលរដ្ឋខ្មែរ ដែលជាអ្នកកាន់សាសនាព្រះយេស៊ូគ្រីស្ទ រួមចំណែកជាមួយរាជរដ្ឋាភិបាល ក្នុងការបម្រើសេចក្តីត្រូវការរបស់ប្រជាពលរដ្ឋ នៅមូលដ្ឋានស្រុកពារាំង ខេត្តព្រៃវែង ដោយមិនប្រកាន់និន្នាការនយោបាយ និងជំនឿសាសនាអ្វីឡើយ។

 លោកស្រីអំពាវនាវដល់គ្រូពេទ្យ គប្បីបន្តយកចិត្តទុកដាក់បន្ថែមទៀតក្នុងការព្យាបាលបងប្អូនប្រជាពលរដ្ឋ មិនថាយប់ឬថ្ងៃនោះទេ ត្រូវព្យាបាលពួកគាត់ ឲ្យបានទាន់វេលា និងត្រូវថែរក្សានូវសមិទ្ធផល ដែលបានកើតឡើងនាពេលនេះឲ្យស្ថិតស្ថេរយូរអង្វែង ដើម្បីទុកជាផលប្រយោជន៍រួមរបស់ប្រជាពលរដ្ឋគ្រប់រូប៕