​រុស្ស៊ី៖ រដ្ឋមន្ត្រីការបរទេស​រុស្ស៊ីហាក់​ដូច​ជា​ច្រានចោល​តម្រូវការ​ របស់​អង្គការសហប្រជាជាតិដើម្បី​ជួយ​ធានា​សុវត្ថិ​ភាព​ច្រក​របៀង​មនុស្សធម៌​ ចេញពី​ទីក្រុង​មួយ​ចំនួន​របស់​អ៊ុយ​ក្រែ​ន​។​ ​នៅ​ក្នុង​បទសម្ភាសន៍​ជាមួយ​ទូរទស្សន៍ Al-Arabiya របស់​អា​រ៉ា​ប៊ី​សា​អូឌីត រដ្ឋមន្ត្រីការបរទេស​រុស្ស៊ីលោក Sergey Lavrov ត្រូវ​បាន​សួរ​អំពី​សំណើ​របស់​អគ្គលេខា​ធិការ​អង្គការសហប្រជាជាតិ​លោក Antonio Guterres សម្រាប់​ជំនួយ​មនុស្សធម៌ និង​ការ​ជម្លៀស​ជន​ស៊ីវិល​នៅ​អ៊ុយ​ក្រែ​ន​។​

លោក Lavrov បាន​និយាយ​ថា ​មិន​ចាំ​បាច់​សម្រាប់​ភាគី​ណាមួយ​ដើម្បី​ផ្តល់​ជំនួយ​ ក្នុង​ការ​បើក​ច្រក​របៀង​មនុស្សធម៌​នោះ​ទេ​។​ លោក​បាន​កោតសរសើរ​ចំពោះ​ចំណាប់អារម្មណ៍ ​របស់​អគ្គលេខាធិការ​អង្គការ​សហប្រជាជាតិ​លោក Antonio Guterres សម្រាប់​ការ​ជួយ​ក្នុង​ដំណោះស្រាយ​។ ក្នុង​អំឡុង​ពេល​សម្ភាសន៍​រយៈពេល​មួយ​ម៉ោងលោក Lavrov បាន​ចោទប្រកាន់​ប្រទេស​លោក​ខាង​លិច​ថា ​បាន​បំផ្លិចបំផ្លាញ​កិច្ចចរចា​របស់​រុស្ស៊ី​ជាមួយ​អ៊ុយ​ក្រែ​ន​។​

​លោក​បាន​អះអាង​ថា ការចរចា​នៅ​ទីក្រុង​អ៊ី​ស្តង់​ប៊ុល​ប្រទេស​ទួរគី​កាលពី​ខែ​មុន ​បាន​នឹង​កំពុង​ដំណើរ​ការលើ​បញ្ហា​នៃ​ការ​ទាមទារ​ទឹកដី និង​ការ​ធានា​បាន​សន្តិសុខ​របស់​រុស្ស៊ី​ រហូតដល់​អ្នកការទូត​អ៊ុយ​ក្រែ​ន​បាន​ដើរ​ថយក្រោយ​ តាម​ការ​បង្គាប់​ពី​សំណាក់​ប្រទេស​លោក​ខាង​លិច​។​ ​លោក Lavrov និយាយ​ថា យើង​ជាប់​គាំង​ដោយសារតែ​បំណង​របស់​ពួក​គេ​ក្នុង​ការ​លេង​ហ្គេម​គ្រប់​ពេលវេលា​។ ដោយសារតែ​ការណែនាំ​ដែល​ទទួល​បាន​ពី​ទីក្រុង​វ៉ាស៊ីនតោន ពី​ទីក្រុង​ឡុង​ដ៍ និង​ពី​រដ្ឋធានី​មួយ​ចំនួន​ផ្សេង​ទៀត​មិន​បាន​ពន្លឿន​ការចរចា​នោះ​ទេ​៕

អត្ថបទ៖ ប៊ុនថន