សេវាកម្មសង្រ្គោះបន្ទាន់រដ្ឋអ៊ុយក្រែននិយាយថា ការវាយប្រហារយានដ្រូនរុស្ស៊ីលើផ្ទះមួយខ្នង ស្ថិតក្នុងតំបន់ភាគខាងជើង Sumy បានសម្លាប់មនុស្ស ៤នាក់ នៅព្រឹកថ្ងៃសុក្រនេះ រួមទាំងកុមារម្នាក់ផងដែរ ។

សេវាកម្មសង្រ្គោះបន្ទាន់រដ្ឋអ៊ុយក្រែននៅតំបន់ Sumy បានបញ្ចេញរូបភាពវីដេអូឃ្លីប ឃើញក្រុមភ្នាក់ងារពន្លត់អគ្គិភ័យ កំពុងព្យាយាមពន្លត់អគ្គិភ័យឆាបឆេះផ្ទះមួយខ្នង និងសែងសាកសពមនុស្សនៅក្នុងថង់ដាក់សាកសព ។

លោក Oleh Hryhorov គឺជាប្រធានរដ្ឋបាលយោធាតំបន់ Sumy និយាយថា ស្រ្តី ២នាក់ បុរសវ័យចំណាស់ម្នាក់ និងក្មេងស្រីម្នាក់ដែលមានអាយុជាង ២ឆ្នាំ ត្រូវបានសម្លាប់ ហើយមនុស្ស ៣នាក់ផ្សេងទៀត រងរបួស ក្រោយការវាយប្រហារយានដ្រូនរុស្ស៊ីលើផ្ទះមួយខ្នង ។

នៅថ្ងៃសុក្រនេះដែរ ក្រុមជួយសង្រ្គោះ បាននាំគ្នាបោសសម្អាតកម្ទេចកម្ទីនៅរដ្ឋធានីគីវ របស់ប្រទេសអ៊ុយក្រែន ដើម្បីស្វែងរកអ្នករស់រាន ស្របពេលដែលទង់ជាតិបង្ហូតត្រឹមពាក់កណ្តាលដង ដើម្បីប្រារព្ធថ្ងៃកាន់ទុក្ខ រយៈពេល ១ថ្ងៃ ក្រោយការវាយប្រហារមីស៊ីល និងយានដ្រូនទ្រង់ទ្រាយធំរបស់រុស្ស៊ី បានសម្លាប់មនុស្សយ៉ាងហោច ៣០នាក់ ៕