ពិភពលោក៖ ថ្ងៃទី១ ខែឧសភាត្រូវបានប្រារព្ធឡើងជាថ្ងៃទិវាពលកម្មអន្តរជាតិ ឬ May Day នៅទូទាំងពិភពលោក។ ក្រុមបាតុករនៅជុំវិញពិភពលោកបានចេញតវ៉ានៅតាមដងផ្លូវនានាកាលពីថ្ងៃអាទិត្យ ដើម្បីអបអរសាទរដល់កម្មករ និងជំរុញឲ្យមានការលើកកម្ពស់សិទ្ធិការងារ។
មនុស្សរាប់ម៉ឺននាក់បានប្រារព្ធទិវា May Day ដែលជាទិវាអន្តរជាតិរបស់កម្មករដោយមានការប្រមូលផ្ដុំគ្នានៅក្នុងប្រទេសកូរ៉េខាងត្បូង ស្រីលង្កា កម្ពុជា ស៊ែប៊ី ទួរគី ឥណ្ឌា ប៉ាគីស្ថាន ក្រិក បារាំង និងកោះស៊ីបស្ថិតក្នុងចំណោមប្រទេសជាច្រើននៅលើពិភពលោកផងដែរ។ ប្រជាពលរដ្ឋ និងសហជីពនៅក្នុងទីក្រុងជាច្រើនទូទាំងអឺរ៉ុប បាននាំគ្នាចេញទៅកាន់តាមដងផ្លូវនានារៀបចំក្បួនព្យុហយាត្រា ដោយមានការតវ៉ាបង្ហាញដល់រដ្ឋាភិបាលរបស់ពួកគេ ជាក់ស្ដែងនៅក្នុងប្រទេសបារាំង ភាពតានតឹងបានផ្ទុះឡើងនៅកន្លែងប្រមូលផ្ដុំក្នុងទីក្រុង Paris កាលពីថ្ងៃអាទិត្យ ខណៈក្រុមអ្នកតវ៉ារាប់ពាន់នាក់បានប្រើក្បួនព្យុហយាត្រាទិវាពលកម្មអន្តរជាតិនេះ ជាការបង្ហាញការប្រឆាំងទៅនឹងប្រធានាធិបតីទើបជាប់ឆ្នោតថ្មីៗលោក Emmanuel Macron។
ក្នុងប្រទេសទួរគីវិញ នគរបាលបង្ក្រាបកុបកម្មបានចាប់ខ្លួនក្រុមអ្នកតវ៉ារាប់សិបនាក់ ដែលព្យាយាមទៅកាន់ទីលានចតុរង្គ Taksim របស់ទីក្រុង Istanbul ចូលរួមបាតុកម្មថ្ងៃទិវាពលកម្មអន្តរជាតិ ប្រឆាំងនឹងបញ្ហាសេដ្ឋកិច្ចដែលបណ្ដាលមកពីអតិផរណាហក់ឡើងខ្ពស់។ ប្រទេសហៃទី និងកូឡុំប៊ីបានរៀបចំក្បួនព្យុហយាត្រាកាលពីថ្ងៃអាទិត្យ ដើម្បីប្រារព្ធទិវាពលកម្មអន្តរជាតិដើម្បីរំឭកដល់កម្មករ។ នៅហៃទី កម្មកររាប់រយនាក់បានចេញតវ៉ាតាមដងផ្លូវដោយកាន់ផ្ទាំងផូស្ទ័រសរសេរដោយដៃ និងផ្ទាំងប្រកាសបដាទាមទារការចាប់អារម្មណ៍ដល់ប្រាក់កម្លៃទាប៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
