ប្រណាំងយានយន្ដ៖ ការប្រកួតកីឡាប្រណាំងយានយន្ដ GCC ជ្រើសរើសជើងឯកប្រចាំឆ្នាំ២០២២ ដែលរៀបចំដោយសហព័ន្ធកីឡាយានយន្ដកម្ពុជាបានប្រកាសទទួលចុះឈ្មោះចូលរួមប្រកួតហើយ ខណៈព្រឹត្តិការណ៍នេះគ្រោងធ្វើការប្រកួតជុំទី១ នាចុងខែឧសភានេះ។
លោក ខៃ វណ្ណៈ អគ្គលេខាធិការរងសហព័ន្ធកីឡាយានយន្ដកម្ពុជា បានថ្លែងក្នុងសន្និសីទសារព័ត៌មានស្ដីពីការប្រកួតនេះកាលពីល្ងាចថ្ងៃទី០១ ខែឧសភាថា ការចុះឈ្មោះចូលរួមការប្រកួតជើងឯកប្រចាំឆ្នាំនេះគឺមិនកំណត់ចំនួនឡើយ ប៉ុន្ដែកីឡាករ-កីឡាការិនីចង់ចូលរួម លុះត្រាតែមានអាជ្ញាប័ណ្ណប្រណាំងយានយន្ដ ហើយត្រូវតែមានក្លិប ឬក្រុមចុះឈ្មោះចូលរួមប្រកួតផងដែរ។ ព្រឹត្តិការណ៍ប្រណាំងយានយន្ដ GCC ជើងឯកប្រចាំឆ្នាំ២០២២ គ្រោងធ្វើឡើងចំនួន ៣ជុំ ដោយជុំទី១ នឹងចាប់ផ្ដើមការប្រកួតនាថ្ងៃទី២៨-២៩ ខែឧសភានេះ មុនឈានដល់ការប្រកួតជុំទី២ នាខែតុលា និងជុំចុងក្រោយប្រកួតនាខែធ្នូខាងមុខ។ ក្នុងនាមសហព័ន្ធលោក ខៃ វណ្ណៈ បានប្ដេជ្ញាជំរុញការរៀបចំណេះឲ្យរលូន និងទទួលបានជោគជ័យ ពិសេសការប្រកួតជុំទី១ នាចុងខែនេះតែម្ដង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
