ភ្នំពេញ៖ ក្រុមគ្រូពេទ្យបានបន្តចល័តពីសាលារៀនមួយទៅសាលារៀនមួយ ដើម្បីធ្វើការចាក់វ៉ាក់សាំងដូសជំរុញជូនសិស្សានុ សិស្ស ដែលដល់ពេលកំណត់ត្រូវទទួលការចាក់។

បច្ចុប្បន្នក្រុមគ្រូពេទ្យ បានបន្តចល័តនាំយកវ៉ាក់សាំងទៅចាក់ជូនសិស្សានុសិស្ស​នៅតាមទីតាំង​សាលារៀន​ដោយផ្ទាល់ ដោយផ្លាស់ប្ដូរពីសាលារៀនមួយ ទៅសាលារៀនមួយទៀត ទៅតាម​ផែនការ​ការងាររបស់ខ្លួន។

ជាក់ស្ដែងសម្រាប់ក្រុមគ្រូពេទ្យក្រសួងសុខាភិបាល បានចាប់ផ្ដើមចុះចាក់វ៉ាក់សាំងតាមសាលារៀន ក្នុងភូមិសាស្រ្តខណ្ឌ ពោធិ៍សែនជ័យ តាំងពីថ្ងៃទី ២៥ ខែមេសាមកម្លេះ ដោយការចុះវ៉ាក់សាំង​នៅ​ទីតាំង​សាលារៀន គឺមានចំនួន ១៥សាលាបឋមសិក្សា និងមានចំនួនសិស្សត្រូវចាក់ដូសជំរុញ​សរុប​ជិត ១១០០០នាក់។ ការចាក់នេះតាមការគ្រោងគឺបញ្ចប់នៅថ្ងៃទី ១៣ ខែ ឧសភា ខណៈដែលថ្ងៃនេះ ក្រុមគ្រូពេទ្យកំពុងចាក់វ៉ាក់សាំង​នៅសាលាបឋមសិក្សា ទួលសុភាឃួន។

ស្របពេលកំពុងចាក់វ៉ាក់សាំងនៅសាលាបឋមសិក្សា ​ទួលសុភាឃួន ​នៅថ្ងៃនេះ ​អ្នកគ្រូពេទ្យ ស្រស់ សម្ផស លើកឡើងថា ការចុះចាក់វ៉ាក់នៅទីតាំងសាលារៀនផ្ទាល់​ ជាទីតាំងត្រឹមត្រូវ។ ការលើកឡើងបែបនេះ ​ព្រោះអ្នកគ្រូពេទ្យមើលឃើញថា សិស្សតូចៗជាច្រើនពុំទាន់បាន​ចាក់វ៉ាក់សាំង​ដូសជំរុញ។

ការចុះវ៉ាក់សាំងនៅទីតាំងសាលារៀននេះ ក៏ទទួលបានការពេញចិត្តពីអាណាព្យាបាល​សិស្ស​ផងដែរ។ ​អាណាព្យាបាលសិស្សលើកឡើងថា ទោះស្ថានការណ៍កូវីដសព្វថ្ងៃមានភាព​ស្ងប់ស្ងាត់​យ៉ាងណាក្ដី ​តែការចាក់វ៉ាក់សាំងតាមការកំណត់ជារឿងត្រឹមត្រូវ​ ដើម្បីការពារកូនៗរបស់ពួកគាត់។

បច្ចុប្បន្ននេះ ការចាក់វ៉ាក់សាំង ​បានពង្រីកទីតាំងចាក់កាន់តែច្រើន ​លើទីតាំងដែលមានស្រាប់ ដើម្បី​ផ្ដល់ភាពងាយស្រួលជូនប្រជាពលរដ្ឋគ្រប់រូប។​ ក្រុមគ្រូពេទ្យក្រសួងសុខាភិបាល ក្រុមគ្រូពេទ្យ​ក្រសួងការពារជាតិ ​ក៏ដូចជាក្រុមគ្រូពេទ្យស្ម័គ្រចិត្តជាច្រើនក្រុម បានចុះចាក់វ៉ាក់សាំងដោយផ្ទាល់​នៅតាម ទីប្រជុំជន ទីផ្សារ ការដ្ឋានសំណង់ រោងចក្រ និងតាមខ្នងផ្ទះប្រជាពលរដ្ឋ៕ អត្ថបទ៖ គឹមហុក