យោងតាមឯកសារដែលសារព័ត៌មាន​ Reuters បាន​បង្ហាញ​ថា កងទ័ពស៊ូដង់បានកំណត់លក្ខខណ្ឌ ដើម្បី​ទទួលយកយ៉ាងទូលំទូលាយនូវ​សំណើរបស់សហរដ្ឋអាមេរិក សម្រាប់ការបញ្ចប់សង្គ្រាមស៊ីវិលរយៈពេល ៣ឆ្នាំរបស់ប្រទេសនេះ ដោយតម្រូវឱ្យមាន​​ការដកទ័ពចេញទាំងស្រុងដោយកងកម្លាំងគាំទ្ររហ័ស (RSF) ពីទីក្រុង​នានាដែល​​ក្រុម​នេះ​បានកាន់កាប់។

ឯកសារទាំងនេះ ដែលខ្លឹមសារនៃឯកសារទាំងនោះ ត្រូវបានបញ្ជាក់ដោយមន្ត្រីជាន់ខ្ពស់ស៊ូដង់ បង្ហាញថា សំណើរបស់សហរដ្ឋអាមេរិកកាលពីខែមុន បានអំពាវនាវឱ្យភាគីទាំង២ យល់ព្រមលើបទឈប់បាញ់មនុស្សធម៌បន្ទាន់ ៩០​ថ្ងៃ ដែលអនុញ្ញាតឱ្យមានការចរចា អំពីបទឈប់បាញ់ជាអចិន្ត្រៃយ៍ និងរយៈពេល​អន្តរកាល​ដែលដឹកនាំដោយជនស៊ីវិល ឆ្ពោះ​ទៅកាន់ការបោះឆ្នោត។

ឯ​កសារ​នោះ​ក៏បានអំពាវនាវផង​ដែរ​ឱ្យមានយន្តការដឹកនាំដោយអង្គការសហប្រជាជាតិ (UN) ដើម្បីគាំទ្រការដកទ័ពចេញមានកំណត់ដោយកង​កម្លាំង​ RSF ដោយផ្តល់អាទិភាពដល់ភាគខាងជើងតំបន់​ Darfur ជាកន្លែងដែល RSF ទើបតែបានកាន់កាប់ទីក្រុង al-Fashir អំឡុង​ការ​វាយប្រហារដោយហិង្សា និងភាគខាងជើងតំបន់​ Kordofan ដែលជាគោលដៅបច្ចុប្បន្ននៃការវាយប្រហារដោយយាន​ដ្រូន​របស់ RSF។

ឯកសារបានបង្ហាញទៀត​ថា រដ្ឋាភិបាលស៊ូដង់ដឹកនាំដោយកងទ័ព បានទទួលយកសំណើភាគច្រើន ប៉ុន្តែគ្រាន់​ជំទាស់នឹងការដកទ័ពចេញមានកំណត់ប៉ុណ្ណោះ ដោយលើកឡើង​ថា ផែនការនេះត្រូវតែរួមបញ្ចូល «ការដក ​ (RSF) ចេញពីទីក្រុងទាំងអស់ដែលកង​កម្លាំង​នេះ​បានកាន់កាប់ចាប់តាំងពីថ្ងៃទី១១ ខែឧសភា ឆ្នាំ២០២៣»។

ការទាមទាររបស់កងទ័ព ដើម្បី​ឱ្យមាន​ការដកកង​កម្លាំង​ចេញយ៉ាងទូលំទូលាយរបស់ RSF គឺជាឧបសគ្គម្តងហើយម្តងទៀត នៅក្នុងកិច្ចខិតខំប្រឹងប្រែងសន្តិភាពពីមុន​។ ក្រសួងការបរទេសសហរដ្ឋអាមេរិកមិនបានឆ្លើយតបទៅនឹងសំណើសុំការអត្ថាធិប្បាយឡើយ​។ ហើយ​ក្រសួងការបរទេសស៊ូដង់ក៏​មិនបានឆ្លើយតបភ្លាមៗនោះដែរ ទៅនឹងសំណើសុំការអត្ថាធិប្បាយដូចគ្នា​នេះ​៕