ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃចន្ទ ទី១៣ ខែកក្កដា ថា សហរដ្ឋអាមេរិកកំពុងដាក់ការបិទផ្លូវដឹកជញ្ជូនអ៊ីរ៉ង់ឡើងវិញនៅឈូងសមុទ្រ ហើយនឹងធានាថាច្រកសមុទ្រ Hormuz នៅតែបើកទូលាយដោយគ្មានការបង់ប្រាក់ បន្ទាប់ពីភាគីទាំងពីរបានវាយប្រហារគ្នាទៅវិញទៅមកដោយមីស៊ីលនិងយានដ្រូនបន្ថែមទៀត។ អរិភាពចុងក្រោយបានកើតឡើងបន្ទាប់ពីការប្រកាសរបស់អ៊ីរ៉ង់កាលពីចុងសប្តាហ៍ថា ខ្លួនបិទច្រកសមុទ្រ ដោយបានធ្វើឱ្យមានមន្ទិលសង្ស័យបន្ថែមទៀតលើលទ្ធភាពនៃកិច្ចព្រមព្រៀងបណ្តោះអាសន្នដើម្បីបញ្ឈប់សង្គ្រាម និងបានធ្វើឱ្យតម្លៃប្រេងកើនឡើងខ្ពស់។

លោក Trump បាននិយាយនៅលើបណ្តាញ Truth Social ថា ច្រកសមុទ្រ Hormuz បើកទូលាយ វានឹងនៅតែបើកចំហ ដោយមានឬគ្មានអ៊ីរ៉ង់។ យើងកំពុងដាក់ការបិទផ្លូវអ៊ីរ៉ង់ជាថ្មី។ «ចាប់ពីពេលនេះទៅ សហរដ្ឋអាមេរិកនឹងត្រូវបានគេដឹងថាជា «អ្នកការពារនៅច្រកសមុទ្រ Hormuz» ប៉ុន្តែការធ្វើដូច្នេះ និងបញ្ហានៃភាពយុត្តិធម៌នឹងត្រូវបានសងវិញក្នុងអត្រា២០ភាគរយលើទំនិញទាំងអស់ដែលបានដឹកជញ្ជូន»។ បញ្ជាការដ្ឋានយោធាចម្រុះជាន់ខ្ពស់របស់អ៊ីរ៉ង់បាននិយាយថា សហរដ្ឋអាមេរិកពុំមានតួនាទីក្នុងការកំណត់អនាគតនៃច្រកសមុទ្រ Hormuz ទេ ហើយនឹងមិនត្រូវបានអនុញ្ញាតឱ្យជ្រៀតជ្រែកនៅច្រកសមុទ្រនេះដែរ។ រដ្ឋមន្ត្រីការបរទេសអ៊ីរ៉ង់ លោក Abbas Araqchi បានសរសេរនៅលើបណ្តាញ X ថា ទីក្រុងតេអេរ៉ង់គឺជាអ្នកការពារនៅច្រកសមុទ្រនេះ ហើយនឹងនៅតែការពារជារៀងរហូត។

ទីភ្នាក់ងារដឹកជញ្ជូនរបស់អង្គការសហប្រជាជាតិ បានច្រានចោលសំណើរបស់លោក Trump ដោយនិយាយថា ខ្លួនប្រឆាំងនឹងថ្លៃសេវាណាមួយសម្រាប់ច្រកសមុទ្រដែលត្រូវបានប្រើប្រាស់ក្នុងការធ្វើនាវាចរណ៍អន្តរជាតិ និងបានសង្កត់ធ្ងន់ថា ពុំមានមូលដ្ឋានច្បាប់សម្រាប់ការដាក់ចេញការបង់ប្រាក់ជាកាតព្វកិច្ចលើការដឹកជញ្ជូនតាមច្រកសមុទ្រនេះទេ។