ភ្នំពេញ៖ សម្ដេចតេជោ ហ៊ុន សែន បានផ្ញើសារថ្លែងអំណរគុណដល់ប្រជាជនខ្មែរ ដែលរស់នៅសហរដ្ឋអាមេរិក ដែលបានចេញវីដេអូជាបន្តបន្ទាប់បញ្ជាក់ពីការត្រៀម ខ្លួនទទួលវត្តសម្ដេចពេលទៅដល់ទឹកដីអាមេរិកក្នុងសប្ដាហ៍ទី២ នៃខែឧសភានេះ។

ថ្លែងក្នុងឱកាសអញ្ជើញជួបសំណេះសំណាល ព្រមទាំងផ្តល់រង្វាន់លើកទឹកចិត្តដល់សិស្ស​ប្រលង​ជាប់និទ្ទេសA ឆ្នាំសិក្សា២០២០-២០២ នាថ្ងៃទី៣ខែឧសភា ឆ្នាំ២០២២នេះ សម្តេច​បញ្ជាក់ថា ក្នុង​ដំណើរទៅអាមេរិក​នៅគ្រានេះ សម្ដេច​ទទូចដល់ប្រជាជនខ្មែរនៅអាមេរិក ដែលគាំទ្រសម្ដេច កុំធ្វើ​បាតុកម្មតបត និងក្រុមប្រឆាំងឡើយ បើសិនពួកគេមានបាតុកម្មប្រឆាំងសម្ដេច ពីព្រោះតែវាមិន​មែនជារឿងចាំបាច់នោះទេ។

តបតាមទឹកចិត្តរបស់ប្រជាជនខ្មែរនៅសហរដ្ឋអាមេរិកដែលគោរពស្រឡាញ់សម្ដេច សម្ដេច​នឹង​ជួបពួកគាត់​ជាបន្តបន្ទាប់ ​ទៅតាមពេលវេលាជាក់ស្តែង។

សម្ដេច អះអាងថា សម្ដេចក៏នឹងរង់ចាំមើលក្រុមប្រឆាំងថា​តើមានចំនួនប៉ុន្មាននាក់​ដែលធ្វើបាតុកម្ម​ប្រឆាំងសម្ដេច ​តែទោះយ៉ាងណាសម្ដេចក៏ទទូចដល់ប្រជាជនខ្មែរនៅអាមេរិក គឺសូមកុំធ្វើបាតុកម្ម​ប្រឆាំង​ក្រុមប្រឆាំងវិញអី​ ព្រោះវាមិនមែនជារឿងចាំបាច់នោះទេ។

គួរបញ្ជាក់ថា ប្រជាជនខ្មែររស់នៅសហរដ្ឋអាមេរិកជាច្រើន តាមរយៈសារជាវីដេអូពួកគាត់​បាន​បង្ហាញ​អារម្មណ៍​សប្បាយរីករាយនៅពេលដែលទទួលដំណឹងថា ​សម្ដេច​នឹងទៅចូលរួមកិច្ច​ប្រជុំ​កំពូល​ពិសេសអាស៊ាន អាមេរិក ក្នុងនាមជាសហប្រធាន​ រួមគ្នានិងប្រធានាធិបតីអាមេរិក នៅ​ថ្ងៃទី១២ និងទី១៣ ខែឧសភា ឆ្នាំ២០២២នេះ។

ពួកគាត់សប្បាយចិត្តដោយសារនឹងបានជួបសម្ដេចតេជោ​ ហ៊ុន សែន ដោយផ្ទាល់ ជាមួយ​ជា​ប្រមុខដឹកនាំកម្ពុជាដែលពួកគាត់ចាត់ទុកថា ​សម្ដេច​ជាមោទនភាពរបស់ពួកគាត់។ ប្រជាជនខ្មែរនៅអាមេរិក ​បានប្រកាសធ្វើដំណើរចេញពីរដ្ឋផ្សេងៗដែលកំពុងរស់នៅ ទៅជួបជុំគ្នា​ក្នុង​រដ្ឋធានីវ៉ាស៊ីនតោន ​ជាទីដែលរៀបចំកិច្ចប្រជុំកំពូលនេះ៕