ប្រធានាធិបតីអាមេរិក លោក Donald Trump បាននិយាយកាលពីថ្ងៃអង្គារ (ទី១៤ ខែកក្កដា ឆ្នាំ២០២៦)​ថា ការវាយប្រហារប្រឆាំងនឹងអ៊ីរ៉ង់ នឹងបន្តមាន​ និងកាន់តែខ្លាំងឡើងៗ ក្នុងរយៈពេលប៉ុន្មានថ្ងៃខាងមុខ ដោយព្រមានថា សហរដ្ឋអាមេរិកនឹងចាប់ផ្តើមកំណត់គោលដៅរោងចក្រថាមពល និងស្ពានរបស់ប្រទេសនេះ នៅសប្តាហ៍ក្រោយ ប្រសិន​បើ​ទីក្រុងតេអេរ៉ង់មិន​វិលត្រឡប់មកកាន់​តុចរចាវិញទេ​នោះ​។

ក្នុងបទសម្ភាសន៍ជាមួយទូរទស្សន៍ Fox News លោក Trump បានបញ្ជាក់​ថា៖ «យើងកំពុងវាយប្រហារពួកគេយ៉ាង​ខ្លាំងបំផុត។ យើងកំពុងវាយប្រហារគ្រប់ទីតាំងទាំងអស់ដែលពួកគេមាននៅតាមបណ្តោយឆ្នេរ និងតំបន់មាត់ទឹក​នានា​​ ហើយ​ការវាយប្រហារទាំងនេះនឹងបន្តទៅមុខទៀត រហូតទាល់តែខ្ញុំនិយាយថា គ្រប់គ្រាន់ហើយ​»។​

ហើយ​នៅពេលត្រូវបាន​សួរថា តើលោក​កំពុងពិចារណាវាយប្រហារគោលដៅថាមពលដែរ ឬទេ លោក​បានឆ្លើយតបថា៖ «ខ្ញុំនឹងទុកគោលដៅថាមពល សម្រាប់ការ​វាយ​ប្រហារ​​ចុងក្រោយ ប៉ុន្តែនៅទីបំផុតយើងនឹងវាយប្រហារគោលដៅថាមពល»។

លោក Trump បានបន្ថែមទៀតថា៖ `យើងនឹងវាយប្រហារពួកគេឱ្យខ្លាំងបំផុត នៅយប់នេះ។ យើងនឹងវាយប្រហារពួកគេឱ្យខ្លាំងបំផុត នៅយប់ថ្ងៃស្អែក។ យើងនឹងវាយប្រហារពួកគេឱ្យខ្លាំងបំផុត នៅយប់បន្ទាប់ទៀត។ ហើយបន្ទាប់មក នៅសប្តាហ៍ក្រោយ ស្ថានភាពនឹងពិត​ជា​កាន់តែអាក្រក់ខ្លាំង សម្រាប់ពួកគេ ពីព្រោះសប្តាហ៍ក្រោយ នឹងដល់វេនរោងចក្រថាមពលហើយ។ សប្តាហ៍ក្រោយនឹងដល់វេនស្ពាននានាហើយ។ យើងនឹងកម្ទេចរោងចក្រថាមពលរបស់ពួកគេទាំងអស់។ យើងនឹងកម្ទេចស្ពានទាំងអស់របស់ពួកគេ លើកលែងតែពួកគេព្រមមកអង្គុយនៅតុចរចា»។

មេដឹកនាំ​អាមេរិក បាន​បញ្ជាក់​ថា លោកជឿជាក់ថា អ៊ីរ៉ង់ «គ្មានជម្រើសអ្វីក្រៅពី» ធ្វើកិច្ច​ព្រមព្រៀងនោះទេ ដោយលោកបានបន្ថែមថា តំណាងសហរដ្ឋអាមេរិកទើប​បានទាក់ទងជាមួយមន្ត្រីអ៊ីរ៉ង់ថ្មីៗនេះ​ ពោលគឺត្រឹមតែមួយម៉ោងប៉ុណ្ណោះ មុនការសម្ភាសន៍នេះចាប់ផ្តើម៕